Nata, edhe këtë 29 nëntor ishte e bardhë. Ngjyrës së kuqe të Festave Kombëtare iu shtua vitaliteti këtë mbrëmje në sheshin “Skënderbej” edhe prej atmosferës së festave të fundvitit. Nata e Bardhë festive përveç numrit të konsiderueshëm të qytetarëve, rrëfen një dominancë artistesh femra, që ndezën atmosferën në skenën e improvizuar në shesh.
Këngëtarja Elhaida Dani solli në skenë tinguj të artë për dashurinë, duke rikrijuar edhe atmosferën e Eurosongut.
Kuq e zi, Vesa Luma pas një mungese të gjatë erdhi më zërin e saj të ëmbël tek publiku kryeqytetas.
Ndërsa, Aurela Gaçe, energjike, duke vërtetuar se sfidën me vitet e ka fituar tanimë dhe sundimtar është sigurisht vokali i saj. Këngëtarja arriti të ndërveprojë me publikun, duke i bërë edhe ata pjesë të kolazhit të këngëve ku ritme popullore e moderne vallëzojnë në harmoni.
Këtij koncerti festiv që u mbajt në këtë 74-vjetor të Çlirimit të Shqipërisë nga Bashkia e Tiranës iu bashkuan gjithashtu emra të tjerë të muzikës, si këngëtari Erik Lloshi, Melissa Magnaneli etj.
Prezantimi i kësaj mbrëmje speciale iu la të resë, Rashel Kolaneci, duke shënjuar edhe eksperiencën e parë të shoëgirl-it, si moderatore. Ndërkohë, që gjatë gjithë natës qëndruan hapur për publikun, Muzeu Historik Kombëtar, Teatri i Kukullave, edhe Bunk’Árti-n.
Nata e Bardhë është quajtur ndryshe “nata pa gjumë”. Për herë të parë në Tiranë është festuar në vitin 2004 nga Bashkia e Tiranës, asokohe kryetar bashkie kryeministri Edi Rama. Kjo datë përkon edhe me Festën e Çlirimit të Vendit. Por, Nata e Bardhë festohet edhe në disa kryeqytete të tjera të Evropës, si Roma, Parisi, Brukseli apo Madridi.
Komente
