Hetimet për të zbuluar kompaninë që shkaktoi ndotjen mjedisore dhe nxori jashtë funksionit impiantin e ujërave të zeza në Durrës do të vazhdojnë me ekspertë private.
Pas dështimit të Laboratorit Shtetëror, Prokuroria e Durrësit ka vendosur të marrë sërish kampionë dhe të realizojë analizat kimike me ekspertë privatë.
Një ditë më parë Report TV publikoi dokumentin e Inspektorati Shtetëror Teknik për Policinë e Durrësit, ku thuhej se nuk mund të realizojë analizat edhe pse ka një laborator të akredituar për naftën e gazin.
Burime për Report TV thanë se zbulimi i lëndës kimike do të çonte hetuesit drejt emrit të kompanisë që derdhi autobotin me mbetje nafte në kanalin e ujërave të zeza.
Ndotja e paprecedentë e 14 qershorit, bllokoi impiantin dhe për tre ditë ujrat e zeza të Durrësit përfunduan në det në zonën e Porto Romanos duke e ndotur atë.
