Ora 8 e mëngjesit e gjen në punishten e tij të vogël, në një prej rrugicave të qytetit të Vlorës. Ndërtimet e shumta në zonën bregdetare e kanë favorizuar Shpëtim Canajn në punën si zdrukthtar.
“Vlora është në kërkesë e sipër sepse gjithë këto pallate që ndërtohen duhen mobiluar. Këtë zanat e kam dashuruar që fëmijë, sa të kem mundësi do punoj se ky ka qenë zanati im i tërë jetës.”, shprehet mjeshtri i drurit në “Një nga ne”.
Me një përvojë mbi 40 vjeçare në treg, ai shquhet për cilësinë, kreativitetin dhe përkushtimin që tregon në punimet e tij. Ndonëse mbizotërojnë prodhimet e importit, Shpëtim Canaj nuk i shikon si pengesë.
“Mobiljet që kanë ardhur nga importi, njerëzit filluan t’i pëlqenin sepse ishin shumë të bukura, por me kalimin e kohës ato u shpërbënë shumë shpejt sepse ishte cilësia shumë e dobët. Tani i janë kthyer mobiljeve artizanale të prodhuar nga duart tona. Ato kanë qëndrueshmërinë, rezistencën dhe bëhen sipas dëshirës që do klienti”, tregon Shpëtimi.
Sfida më e madhe për të është mungesa e fuqisë punëtore.
“Nuk e dashurojnë këtë lloj profesioni. Zanatin ia kam mësuar djalit tim. Ai paguhet më shumë në Gjermani me të njëjtën punë 20 euro/ora. Këtu nuk i merr dot, nuk ka shanse. As unë nuk i marr dot aq.”
Shpëtimi ruan me fanatizëm jo vetëm zanatin e zdrukthtarit, por edhe traditën për muzikën polifonike të Vlorës.
“Grupi polifonik Rromës” është formuar 5 vite më parë dhe ka mbi 40 këngë në repertorin e tij. Duhet të vihej në pah kënga labe pasi kishte vite që po humbiste nga tradita e fshatit. Një pjesë e suksesit të grupit tonë janë dhe emigrantët. Ata na ndihmojnë financiarisht, i kemi si oksigjenin. Nuk i kemi harruar rrënjët, shkojmë në fshatin tonë, e vizitojmë gjithmonë. Ne e kemi në gen këngën labe”, shprehet ndër të tjera.
Emisionin “Një nga ne” mund ta ndiqni çdo të mërkurë, ora 20:00, në ekranin e Report Tv.
Komente
Babai i oltes shume njerez te mire puntore dhe familje e mire
Përgjigju