Kryetari i Kuvendit, Niko Peleshi, priti sot në Kryesinë e Kuvendit, Presidentin e Letonisë, Edgars Rinkēvičs, i cili ndodhet për një vizitë zyrtare në Shqipëri.
Gjatë takimit u vlerësuan marrëdhëniet e shkëlqyera mes dy vendeve dhe u theksua nevoja për forcimin e mëtejshëm të bashkëpunimit në fusha kyçe si integrimi europian, siguria rajonale dhe shkëmbimi i përvojave parlamentare.
Një vend të rëndësishëm në bisedë zuri bashkëpunimi në kuadër të NATO-s, ku prania e trupave shqiptare në Letoni dhe angazhimi i trupave letoneze në misionin e KFOR-it në Kosovë janë një dëshmi e qartë e mbështetjes së ndërsjellë dhe e solidaritetit mes dy vendeve aleate.
Kryetari i Kuvendit, Niko Peleshi, falënderoi Letoninë për mbështetjen e saj të vazhdueshme ndaj Shqipërisë në procesin e integrimit europian, ndërsa Presidenti Rinkēvičs vlerësoi rolin e Shqipërisë si faktor stabiliteti në Ballkanin Perëndimor dhe shprehu gatishmërinë për të thelluar më tej bashkëpunimin ekonomik, arsimor dhe kulturor.
Ky takim konfirmoi vullnetin e përbashkët për të forcuar më tej marrëdhëniet dypalëshe dhe partneritetin euroatlantik.
Lajmi kryesor:
Begaj pret presidentin e Letonisë, në fokus të takimit çështjet në fushën e sigurisë dhe mbrojtjes: Provokimet e Rusisë na bashkojnë më shumë
S.B/ReportTv.al