Nuk është hera e parë që ndodh, por komplimentet janë gjithmonë të bukura, veçanërisht kur vijnë nga dikush si Pep Guardiola, i cili ka fituar 39 trofe si trajner (pa i llogaritur ato si lojtar).
"Kur luan si Barcelona, e di që stadiumet nuk do të jenë kurrë bosh. Interi është gjithashtu shumë i fortë, është e pabesueshme sa të mirë janë në mbrojtje, në tranzicione, në fizikalitet dhe sa mirë të organizuar janë. Simone Inzaghi është një trajner i jashtëzakonshëm. Falë kësaj lloj ndeshjeje, stadiumet nuk do të jenë kurrë bosh dhe futbolli do të rritet gjithmonë", tha Pep duke komentuar barazimin 3-3 mes Barcelonës dhe Interit në Ligën e Kampionëve.
Guardiola kishte thënë gjithashtu fjalë lavdërimi para ndeshjes Manchester City - Inter, ndeshja e parë e Champions për dy ekipet dhe që u mbyll 0-0 këtë edicion:
"Interi ka një trajner të shkëlqyer, ata janë më të fortët në Itali dhe mund të fitojnë Ligën e Kampionëve. Lautaro Martinez është i veçantë, nëse shënon, por bën edhe shumë gjëra të tjera", tregoi Guardiola.
Në konferencë për shtyp, Pep u rikthye edhe në finalen e Ligës së Kampionëve të vitit 2023, të fituar nga “Qytetarët” me një gol të Rodrit.
“E pashë përsëri atë ndeshje dhe edhe atëherë ata ishin tashmë të fortë, para asaj finale nuk mendoja se isha superior ndaj tyre”, vijoi ai.
Dhe në fakt, para finales së vitit 2023, katalanasit e kishin mbushur Inzaghin me komplimente.
"Më bënë përshtypje si ekip, duke parë disa minuta nga ndeshjet e tyre e kupton që janë seriozë. Ata nuk dinë vetëm të mbrohen, ekipet italiane dinë të mbulojnë mirë hapësirat, por Interi shton aftësinë për të mos u nervozuar nëse janë nën presion dhe për të dalë me topin në këmbë", përfundoi Pep.
Komente
