“Ai iu afrua gazetarisë në një moshë shumë të re, një pasion që u ringjall me përvoja në radio, televizion dhe media të shkruar, fillimisht në Itali, pastaj në Shqipëri, ku për vite me radhë ka qenë një pikë referimi për informacionin e pavarur dhe historinë e kohëve të fundit të Shqipërisë, falë dy muzeve që ai konceptoi dhe themeloi.” Me këtë motivacion, është nderuar këtë të shtunë në Itali me çmimin prestigjioz të gazetarisë “ANTONIO MAGLIO”, gazetari dhe botuesi Carlo Bollino.
“Çmimi i karrierës” i është akorduar nga Këshilli Kombëtar i Urdhrit të Gazetarëve italianë, në kuadër të Edicionit XIV të Çmimit Kombëtar të Gazetarisë, që u zhvillua të shtunën më 6 shtator në Alezio.
Në faqen online të Urdhrit të Gazetarit, në jetëshkrimin e shkurtër, që argumenton edhe dhënien e çmimit kombëtar italian, shkruhet se Bollino e filloi karrierën e tij në gazetari në një moshë të re, fillimisht në stacione radiofonike private dhe më pas në shtyp, duke u përqendruar menjëherë në krimin dhe krimin e organizuar, përfshirë lindjen e Sacra Corona Unita në Puglia.
I punësuar nga Quotidiano di Lecce, ai u bë gazetar profesionist në vitin 1986. Në vitin 1988, ai shkroi librin investigativ "La posta in gioco", për vrasjen e këshilltares së Nardò-së, Renata Fonte, i cili u adaptua në film. Në vitin 1989, ai u transferua në Bari si korrespondent për Gazzetta del Mezzogiorno. Ai mbuloi, ndër të tjera, krizën në Somali, Rumani, luftën në ish-Jugosllavi, luftën në Irak dhe rënien e komunizmit në Shqipëri. Ai bashkëpunoi me RAI-n në programe të ndryshme si "Telefono Giallo", "Chi l'ha visto" dhe "Porta a porta".
Në vitin 1992, ai u transferua në Tiranë, ku themeloi gazetën e përditshme Gazeta Shqiptare, portalin Balkanweb, Radio Rash dhe News24, stacionin e parë televiziv lajmesh në Shqipëri, në emër të Gazzetta del Mezzogiorno. Në vitin 1999, ai u bë korrespondent i ANSA-s, në Shqipëri duke mbuluar, ndër të tjera, luftërat në Kosovë dhe Maqedoni. Ai iu bashkua "gazetarëve të luftës" të ANSA-s, duke mbuluar, ndër të tjera, konfliktet në Izrael, Gaza dhe Irak.
Në vitin 2007, ai u bë kreu i byrosë së Izraelit të ANSA-s, dhe që nga maji i vitit 2008, redaktor i Gazzetta del Mezzogiorno. Në vitin 2012, ai dha dorëheqjen dhe u kthye në Shqipëri, ku themeloi Report TV dhe Shqiptarja.com, tani ndër mediat më prestigjioze të vendit. Në Shqipëri, ai ka shkruar dhe botuar librat "Heshtja e Dyfishtë" dhe "Në Tunelet e Shqipërisë Sekrete".
Midis viteve 2014 dhe 2016, ai themeloi muzetë "Bunk'Art 1" dhe "Bunk'Art 2" në Tiranë, të vendosur brenda bunkerëve bërthamorë të epokës së Luftës së Ftohtë dhe të dedikuar 45 viteve të komunizmit në vend. Dy muzetë Bunk'Art, për të cilët ai është ende kurator i përgjithshëm, janë sot ndër atraksionet më të rëndësishme turistike të Shqipërisë.
Në një intervistë të dhënë para marrjes së çmimit, për il "Quotidiano di Puglia", i pyetur për sfidat e sotme të gazetarisë mes ndikimit nga teknologjia, Carlo Bollino mesazhin e ka të drejtpërdrejtë për të gjithë gazetarët e rinj: “Modeli i vjetër organizativ ka rënë, por gazetaria, përveçse punë, është një mision që duhet të përkthehet në shërbim ndaj shoqërisë për të afirmuar parimet e demokracisë dhe lirisë”.
Çmimi për shkrimin më të mirë investigativ është fituar nga Francesco G. Gioffredi për reportazhin “Taranto, qyteti i fateve të pezulluara sërish në udhëkryqin mes mosbesimit dhe shpresës”, botuar në Nuovo Quotidiano di Puglia, më 24 maj 2025.
Dy çmimet e dyta janë ndarë për Elisa Venco për hetimin mbi fuqinë dhe rolin e konsumatorëve “Dhe unë nuk të blej!”, botuar në revistën Focus të muajit qershor 2025, dhe për Maria Cristina Fraddosio për artikullin “Gjashtë mijë projekte të djegura nga një firmë. Udhëtim mes rrënojave të bashkëpunimit ndërkombëtar”, botuar në versionin online të HuffPost Italia, më 7 prill 2025.
Çmimi Special iu dha Toti Bellone për artikullin “Kulturë, det, fe dhe magji. Taranto: shumë më tepër se çelik”, botuar në Gazzetta del Mezzogiorno më 11 dhjetor 2024, dhe Anna Paola Lacatena për hetimin “Gra, drogë dhe burg: tavani prej kristali dhe shufrat prej hekuri”, botuar në faqen online të Limes më 16 dhjetor 2024.
Në këtë nismë, të promovuar nga Shoqata “Maglio” dhe Bashkia e Alezios, me mbështetjen e Urdhrit të Gazetarëve dhe të Federatës Kombëtare të Shtypit, bashkëpunojnë edhe Rotary Club Lecce Sud, Quarta Caffè, Kantina Coppola e Gallipolit, Konsorciumi i Vajit të Ullirit Ekstra të Virgjër me Origjinë të Kontrolluar të Tokës së Otrantos, kompania Foresta Forte, agroturizmi Santa Chiara i Alezios dhe revista online ilGrandeSalento.it.
Komente
Ore si nuk e thote njeri qe je nder te paktet qe nuk te ze gjumi per te qene korrekt me rrogat e gazetareve dhe sigurimet. Bolino eshte i vetmi njeri korrekt dhe ne tregun mediatik. Kerkon llogari per punen por nuk ka krahasim me barbonat qe nuk paguajn me muaj e me vite gazetaret je njish. Respekte!
PërgjigjuI nderuar Carlo ju karakterizon durimi dhe qytetaria. Kurajo dhe vrtyti i miresise jane cilesi qe ua njeh cdo shqiptar. Verej qe ju jane sulur sherbenjesit e Berishes edhe ne kete dite te bukur te jetes suaj kur mirrni vleresim dhe mirenjohje nga vendi ku ju niset rrugetimin e gjate e te rendesishem te gazetarise, nga Italia. Ju nuk habiteni me me kete lukuni qe ju versulet ne Shqiperine mem sikur te ishit ne pyllin me te eger ne ferrin dantesk, por ju nuk sprapseni. Ju jemi mirenjohes sepse rezistoni dhe ecni perpara duke bere vetem te mira. Habitesha dikur me ate dyfaqeshin te Gazeta Shqiptare qe ju si italian tregonit krimet e komunizmit. Nuk e beri asnje tjeter, dikush ju kopjoi, por ju mbeteni ai gazetari italjan origjinal dhe i pakopjushem nga askush. Faleminderit
PërgjigjuI vetmi gazetar kualitativ ne shqiperi, me standartet me te larta europiane qe nuk u be pale asnjehere me krimin dhe opoziten e Berishes
Përgjigju