Partizani ka fituar kryendeshjen e javës së 19-të të kampionatit përballë Skënderbeut brenda në Korçë me rezultatin 0-1. Heroi i ekipit të kuq ishte Mala me golin e shënuar në fillim të ndeshjes në minutën e 3-të, ndërsa në pjesën e dytë Partizani humbi edhe një mundësi të mirë për të shënuar golin e dytë, pasi Telushi gaboi nga pika e bardhë e penalltisë duke mbajtur në lojë deri në fund vendasit.
Megjithatë, pavarësisht rasteve të shumta, Skënderbeu nuk e gjeti golin e barazimit duke dalë i dorëzuar nga fusha. Me këtë fitore Partizani arrin në kuotën e 40 pikë pas 19 ndeshjeve, ndërsa Skënderbeu mbetet 10 pikë më pas në vendin e katërt.
Gjatë ndeshjes janë regjistruar disa episode, nga dyluftimet e forta që sollën largimin e Hilës nga fusha me barelë, te goditjet e lojtarëve të Partizanit me topa bore nga tifozët e Skënderbeut. Por, as kjo nuk mjaftoi për të ndalur të kuqtë drejt triumfit në një fushë tejet të vështirë.
Komente
