Një anëtar i Partisë Demokratike në Sarandë, Ilir Mulla ka bërë publike dorëheqjen e tij nga partia, duke ngritur akuza të forta për manipulim dhe parregullsi në procesin e primareve.
Në një deklaratë të shpërndarë në rrjetet sociale, ai shpreh zhgënjimin e tij për mënyrën se si është organizuar votimi, duke theksuar se nuk e ka gjetur emrin e tij në listën e votuesve, pavarësisht se ka qenë prej kohësh pjesë e PD-së dhe ka votuar më parë në procese të tjera zgjedhore.
"Sot bëj dorëheqje nga Partia Demokratike! Zgjedhjet e primareve në Sarandë janë kthyer në dallaver e manipulim! Kam qenë anëtar për kaq kohë dhe kam votuar disa herë, pse sot nuk ishte emri im në listën e votuesve? Si puna ime kishte dhe disa të tjerë! Pse bëhen këto primare? Fallco, apo të fitojë kush e meriton?" – shprehet ai.
I zhgënjyer nga ky proces, ai deklaron se në zgjedhjet e 11 majit do të votojë sipas bindjes së tij personale dhe jo sipas udhëzimeve të partisë. Ai shtron pyetjen nëse anëtarët e thjeshtë të PD-së trajtohen si "mish për top" dhe nëse kjo qasje do të vazhdojë edhe nëse partia kthehet në pushtet.
Në fund të deklaratës, ai bën thirrje që edhe ish-kryeministri Sali Berisha të marrë në konsideratë këto shqetësime, duke theksuar se "lufta brenda llojit është më e keqe se ajo me kundërshtarët politikë".
Reagimi i Ilir Mullës në Facebook
Ndërkohë kandidatja në Primare Manjola Nikollo ka thënë se deri tani i kanë raportuar më shumë se 10 anëtarë të Partisë Demokratike se nuk e kanë gjetur emrin në listat e votimeve
Këto reagime ngre pikëpyetje mbi transparencën e procesit të primareve në Sarandë dhe mbi mënyrën se si po organizohet gara brenda Partisë Demokratike.
Lajmi kryesor:
Mbyllen Primaret/ PD s’publikon numrin e anëtarëve që votojnë në rang vendi! Besnikët e Berishës në lista, deri në orën 16:00 votuan mbi 41 mijë anëtarë (Kandidatët)
G.K/ReportTv.al