Shumë njerëz i kafshojnë buzët gjatë gjithë ditës, disa më butësisht, disa më intensivisht por ka dhe nga ata që i shkaktojnë vetes lëndime të dukshme.
Çfarë fshihet pas këtij zakoni dhe si mund ta ndalojmë atë?
Termi shkencor që e përshkruan këtë veprim është dermatofagia, që përkthehet si një sjellje e përsëritur në të cilën ne kafshojmë buzët me dhëmbë.
Sipas dermatologëve, pas këtij zakoni qëndron ankthi. Nëse kemi një përditshmëri stresuese, kafshimi i buzës kthehet si një mekanizëm që na ndihmon për ta përballuar.
Për shkak se dhëmbët tanë janë shumë më të fortë se lëkura e buzëve, ata mund të shkaktojnë dëmtime të thella të indeve.
Kështu ne mund të marrim plagë dhe lëkura jonë e lënduar nuk mund të mbrohet në mënyrë efektive nga bakteret, prandaj si pasojë mund të shkaktohen irritime dhe infeksione.
Përveç kësaj, nëse i kafshojmë vazhdimisht buzët, ekziston mundësia që struktura e lëkurës sonë të ndryshojë.
Pra, si ta ndalojmë këtë ves?
Fillimisht mjekët rekomandojnë që të gjejmë shkaqet. Nëse i kafshojmë buzët sa herë që ndihemi në ankth, atëherë duhet të flasim me psikologun.
Nëse i kafshojmë buzët sepse janë vazhdimisht të çara, atëherë duhet t'i mbrojmë çdo ditë duke aplikuar një zbutës.
Sa më të hidratuara të jenë buzët tona, aq më pak priremi t'i kafshojmë.
