Sarandë- Policia Kufitare e Qafë-Botës në Sarandë, në bashkëpunim me shërbimet e FRONTEX, goditën sot (1 qershor) një rast të trafikut të klandestinëve nga Shqipëria në drejtim të Greqisë, me qëllime përfitimi.
Në pranga ra një 31-vjeçar britanik, Finan Kibrom, që po shoqëronte një grup emigrantësh, me qëllim kalimin e paligjshëm të kufirit.
“Gjatë këtyre kontrolleve, mbrëmjen e djeshme (31 qershor), në zonën e Kataetos, u konstatua një shtetas i huaj që po shoqëronte një grup prej 7 emigrantësh të paligjshëm, me qëllim kalimin e tyre të paligjshëm në territorin grek”, bënë me dije burime zyrtare.
Gazetari i Report TV, Limos Didani, informon se në vijim të veprimeve proceduriale, u bë arrestimi në flagrancë, për veprën penale “dhënia e ndihmës për kalim të paligjshëm të kufijve shtetërorë”, i 31-vjeçarit, banues në Mbretërinë e Bashkuar.
“Nga hetimet paraprake rezultoi se ky shtetas kishte ndërmarrë shoqërimin e personave të mësipërm drejt kufirit, kundrejt pagesës, me qëllim kalimin e tyre të paligjshëm në Greqi”, sqaroi policia.
Materialet procedurale u referuan në Prokurorinë e Sarandës për veprime të mëtejshme dhe zbulimin e të gjithë personave të implikuar në këtë rrjet.
Komente
