Këshilli i Lartë Gjyqësorë reagon për herë të parë pas kritikave të kryeministrit Rama mbi punën e disa gjyqtarëve, të cilët sipas tij pengonin shembjen e ndërtimeve pa leje në hapësirat publike. Rasti më i fundit ishte gjyqtari Ligoraq Toshi. Në përplasjen mes tyre në distancë KLGJ i quajti ndërhyrje në pavarësinë e gjyqësorit kritikat e Ramës dhe cënim të punës dhe figurës së gjyqtarëve.
Nuk vonoi shumë dhe Edi Rama iu kundërpërgjigj duke thënë se roli i KLGJ është të jetë garant për një drejtësi në favor të qytetarëve.
“Roli i saj themelor është të shqetësohet për cilësinë e drejtësisë, si edhe të garantojë publikun se vendimet që merren nga gjykatësit në dëm të tij, nuk kalojnë pa u analizuar dhe gjykatësit nuk janë maliqër që bëjnë ç’të duan me ligjin në emër të pavarësisë",- tha Rama.
Replikë pati edhe mbi qëndrimin e KLGJ-së, se “për të kundërshtuar vendimet e gjykatave, duhet të ndiqen rrugët ligjore”
"KLGJ ka harruar gjithashtu se si instanca më e lartë e vetëqeverisjes së gjyqësorit, ka jo vetëm të drejtën po edhe detyrën të marrë seriozisht shqetësimet e palëve të cënuara nga vendime qorre të gjykatësve, të cilat në këtë rast janë të ububushme për nga mungesa e ndjeshmërisë ndaj interesit publik. Të paktën ka thënë një të vërtetë se “çdo ankesë apo pretendim në lidhje me sjelljen apo integritetin e një gjyqtari duhet të drejtohet pranë institucioneve përkatëse”, gjë për të cilën e kam informuar në çdonjërin nga rastet publikun, se do të bëjmë duke iu drejtuar pikërisht KLGJ dhe ILD si “institucionet përkatëse”,- deklaroi kreu i qeverisë.
Më herët kreu i qeverisë kishte shfaqur rezerva edhe për vendimet e gjyqtarëve Hazbi Balliu dhe Klarent Demirit po për të njëjtin motiv. Këto reagime ndaj gjyqtarëve thotë kryeministri Rama kanë ardhur si pasojë e nevojës për t’u shpjeguar qytetarëve, se përse ngrehina të caktuara në mes të rrugës nuk po largohen për t’I hapur rrugë lirimit të hapësirave publike, njëjtë sic po ndodh në të gjithë vendin.
Deputeti demokrat Gazment Bardhi ka reaguar lidhur me kundërpërgjigjen e kryeministrit Edi Rama ndaj Këshillit të Lartë Gjyqësor, pasi ky i fundit tha se deklaratat e numrit një të qeverisë për vendimet e gjykatësve cenojnë pavarësinë e gjyqësorit.
Bardhi shkruan se kundërpërgjigja e Ramës, tregon se ai nuk kupton rolin e KLGJ-së dhe i bën thirrje të heqë dorë nga komentet për gjyqtarët dhe prokurorët.
“Edi Rama përpara se të “shtrembërojë” nga padija e thellë rolin e KLGJ, bën mirë të kuptojë rolin e tij:
- Është për të luftuar bandat, jo për ti ulur në qeverisje; ose je
- Është për ti shkatërruar ekonomikisht bandat, jo për ti dhënë licenca, tendera, koncesione apo leje ndërtimi;
- Është për të luftuar korrupsionin, jo për të ligjeruar atë përmes projekteve si inceneratorët që nuk ekzistojnë;
- Është për tu gjykuar nga prokurorët e gjykatësit; jo për ti gjykuar ai ato!
Prandaj bën mirë që përpara se të gjykojë gjyqtarë e prokurorë që nuk i vijnë pas avazit apo humorit të tij, të kujtohet se asnjë Kyeministër në Europë, nuk komenton e jo më të sulmojë gjyqtarë e prokurorë specifik për çështje specifike.
Dhe boll harxhoi kohën me çështje që as i kupton dhe as mundet ti kuptojë, sepse Edi Rama është gatur si “antiligji” dhe “anti interesi publik”,- shkruan Bardhi.
Këshilli i Lartë Gjyqësor ka reaguar një ditë pasi Kryeministri Edi Rama kritikoi gjyqtarin Ligoraq Toshi për të cilin tha se nuk ka lejuar prishjen e një ndërtese pa leje që ka bllokuar hapësirën mes dy pallateve në Tiranë.
Në një reagim publik, KLGJ thotë se deklarata të tilla cënojnë figurën e gjyqtarëve dhe minojnë pavarësinë e gjyqësorit.
Këshilli i Lartë Gjyqësor apelon që për çdo pretendim në lidhje me vendimet gjyqësore, të bëhet ankim në një gjykatë më të lartë.
Gjyqtari Ligoraq Toshi ishte i radhës që u kritikua nga Kryeministri Edi Rama, pas Hazbi Balliut dhe Klarent Demirit.
Deklarata e Këshillit të Lartë Gjyqësor:
Këshilli i Lartë Gjyqësor, duke marrë shkas nga deklaratat e fundit të subjekteve publike apo private, rithekson edhe njëherë se deklarata të tilla cënojnë figurën dhe dinjitetin e gjyqtarëve si dhe minojnë pavarësinë e pushtetit gjyqësor.
Në çdo shoqëri demokratike, gjyqtarët janë garantues të barazisë së palëve përpara ligjit. Për rrjedhojë, ushtrimi i funksionit të tyre duhet të jetë i pavarur dhe i çliruar nga çdo formë ndikimi, duke ju nënshtruar vetëm Kushtetutës dhe ligjeve. Në një shtet të së drejtës, ndarja dhe balancimi i pushteteve përbën parim themelor dhe gjyqtari ushtron funksionet në mënyrë të pavarur, duke vlerësuar faktet dhe interpretuar ligjin, i lirë nga çdo ndikim i jashtëm.
Këshilli ju bën thirrje gjithë subjekteve publike dhe private të respektojnë pavarësinë e gjyqësorit si një nga themelet e shtetit të së drejtës. E vetmja rrugë për të kundërshtuar një vendim gjyqësor është përmes mjeteve procedurale të parashikuara nga ligji, duke u ankuar në një gjykatë më të lartë. Po ashtu, çdo ankesë apo pretendim në lidhje me sjelljen apo integritetin e një gjyqtari duhet të drejtohet pranë institucioneve përkatëse.
KLGJ në përputhje me kompetencat kushtetuese, shpreh mbështetjen e plotë ndaj të gjithë gjyqtarëve dhe përpjekjeve të tyre të përditshme në mbrojtje të të drejtave të qytetarëve dhe në shërbim të interesit publik. Po ashtu i inkurajon ata të ushtrojnë funksionin e tyre, në mënyrë të përgjegjshme dhe të pavarur nga çdo ndikim i jashtëm.
Në një shtet të së drejtës – i cili sot është më pranë se kurrë aspiratës për t’u bërë pjesë e Bashkimit Evropian – vetëm përmes një sistemi gjyqësor të pavarur mund të sigurohet barazia para ligjit dhe një drejtësi efektive, e cila meriton besimin e publikut.
Komente
Organet e drejtësisë të reagojnë positivisht dhe jo të bëj ping pong për ankesat ndaj gjyqtarve. Mos ngatrroni diktatin me konstatimet. Si çdo qytetar kryeministri ka té drejtë të ngrej probleme të drejtësisë. KLGJ të mari seriozisht çdo ankesë pavarsisht nga vjen ajo.
PërgjigjuPRESIDENTI i REPUBLIKËS duhet tё luajё rolin e tij si GARANT i KUSHTETUTËS dhe i PUSHTETIT GJYQESOR nё SHQIPËRI. Pushteti Gjyqesor duhet te jete i pavarur nga Pushteti Ekzekutiv, por nen kontrollin e Presidentit te Republikes, si garant i Kushtetutes dhe i mbarevajtjes se Pushtetit Gjyqesor. KLD: "Në çdo shoqëri demokratike, gjyqtarët janë garantues të barazisë së palëve përpara ligjit. Për rrjedhojë, ushtrimi i funksionit të tyre duhet të jetë i pavarur dhe i çliruar nga çdo formë ndikimi, duke ju nënshtruar vetëm Kushtetutës dhe ligjeve." Shume e sakte, por Pushteti Gjyqesor duhet te jape llogari perpara PRESIDENTIT TE REPUBLIKES, si garant i KUSHTETUTES SE SHQIPERISE. Ne Shqiperi ky mekanizem KUSHTETUES nuk ekziston dhe Pushteti Gjyqesor ka ikur ne DREJTIM TE PADITUR!
Përgjigju