Një në tre llogari të çelura në sektorin bankar është bosh, pra s’ka para.
Në raportin vjetor për vitin 2024 të Agjencisë së Sigurimit të Depozitave evidentohet se nga rreth 2.7 milionë llogari bankare të hapura pranë bankave të nivelit të dytë gati 950 mijë prej tyre që kanë një ‘arkë’ në bankë kanë gjendje deri në 100 lekë.
Në raport thuhet se kursimet vjet u rritën me 5.6% në raport me 2023-shit, dhe vlera e depozitave nëpër banka arriti në 1 trilionë e 275 miliardë lekë, por rritja erdhi kryesisht nga shtimi i kursimeve nga të pasurit.
Vetëm 5% e totalit të qytetarëve që kanë llogari në bankë disponojnë 739 miliardë lekë kursime ose sa 58% e totalit të depozitave. Pra, vjet të pasurit u bënë edhe më të pasur në kushtet kur pjesa dërrmuese e kursimeve i përket vetëm 125 mijë individëve që kanë të mbyllur në llogaritë e tyre mbi 2.5 milionë lekë. Ndërsa pjesa tjetër prej 1.7 milionë llogarish kanë deri në 2.5 milionë lekë kursime.
Agjencia e Sigurimit të Depozitave sqaron se pjesa rritja e kursimeve vjet u regjistrua më së shumti në monedhën kombëtare me 7.3%, ndërsa depozitat në monedhë të huaj u rritën me 3.9%.
Aktualisht në sektorin bankar 48.6% e kursimeve janë në lekë, 45.8% janë në euro, 3.7% në dollar dhe 1.9% janë në monedha të tjera.
Ulja e peshës së kursimeve në valutë është ndikuar kryesisht nga zhvlerësimi i monedhave të huaja kryesisht euro e dollar që shoqëroi gjithë vitin 2024. Kjo rënie ka ndikim tek kursimet në valutë pasi i bën më të ulta kur tërhiqen nga qytetarët dhe konvertohen në lekë.
Kliko këtu për të lexuar dokumentin e plotë
Komente
