Zhvillohet virtualisht, me lëvizje fondesh që nuk lënë gjurmë, duke përdorur kriptovalutat. Ky është aktiviteti kriminal që po gjen terren çdo vit e më shumë, për të pastruar paratë.
Sipas raportit vjetor të Prokurorisë së Posaçme, ‘Porositësit e kokainës’ pagesën për sasinë e mallit nuk e bëjnë më në cash por përmes monedhave virtuale, duke shmangur në këtë mënyrë kontrollin nga autoritetet financiare.
Në Shqipëri ende nuk ka një kompani të licencuar, ndërsa kriminelët po shfrytëzojnë zyrat e këmbimit valutor.
“Kryerja e transaksioneve në kriptovalutë nuk është e lidhur me objektin e veprimtarisë së këmbimit valutor po dikush që ka një zyrë përmes platformave online ka kryer transaksione për llogari të personave të përfshirë në aktivitet kriminal duke qarkulluar fonde ky aktivitet. X person ka kryer një pagesë në kriptomonedhat në emër të kriminelit në Dubai dhe kundërvlera është paguar nga zyra e këmbimit valutor në Tiranë, si një zyrë klerimi. Pra është përdorur si mundësi për të rregulluar bilancet e pagesave të personave të përfshirë në aktivitet kriminal”, shprehet për Report TV, Dritan Vakaj.
Zyrat e këmbimit valutor kanë shërbyer për kriminelët edhe si ‘arka’ për të depozituar paratë e paligjshme.
“Zyra e këmbimit ka shërbyer si kasafortë për të ruajtur fondet e personave të përfshirë në aktivitetin kriminal, me synim shmangien e kontaktitet të drejtpërdrejtë të personit të përfshirë në krim që të mos i prekin fondet. Kriptovaluta nuk lidhet me faktin e aktivitetit të zyrës së këmbimit, por lehtësirat që mund të ofrojë ky lloj aktiviteti janë përdorur nga keqbërësit për të kryer transaksione me qëllim futjen në qarkullim legal të fondeve nga aktiviteti kriminal.”, thotë Vakaj.
Kjo metodë sipas SPAK përdoret kryesisht nga grupet kriminale që operojnë në Shqipëri, Itali, Gjermani, Spanjë, Belgjikë, dhe Mbretërinë e Bashkuar.
Kriptovalutat janë të ‘preferuara’ pasi janë vështirë të gjurmueshme edhe nga autoritetet shqiptare, financiare apo hetimore.
Metoda tjetër më e përhapur është e futjes së parasë së pistë në sektorin bankar. Duke krijuar biznese për këtë qëllim e shoqëruar më pas me transaksione të shumta sipërmarrje-individ-sipërmarrje krijohet një mjegullnajë financiare që e bën të vështirë ndjekjen e origjinës së vërtetë të parave.
Por kriminelët nuk heqin dorë as nga metodat tradicionale, ajo e faturave fiktive. SPAK evidenton në raport se shoqëritë tregtare të ngritura për të maskuar pastrimin e parave lëshojnë dokumente të falsifikuara për të justifikuar transaksione që në realitet nuk kanë ndodhur kurrë.
“Pasi paratë e pastruara maskohen me sukses, ato më pas investohen në pasuri të paluajtshme. Pasuritë e blera shpesh përfshihen në shitblerje të përsëritura apo marrëveshje huadhënieje, duke krijuar një zinxhir të rremë transaksionesh që legjitimonin të ardhurat”, thotë SPAK.
Paratë e ‘pista’ përveç se përdoren si të pastra për të blerë apartamente, me to janë blerë biznese, automjete luksoze, automjete të blinduara, bizhuteri, flori, ora të markave të shtrenjta apo kriptovaluta. Në total vjet thotë SPAK ka nisur hetim për 47 skema pastrimi parash.
Komente
Sa kohe lulezojne lejet e ndertimit,do te lulezojne dhe kriptovalutat e parate /e pastruara/.
Përgjigju