Policia e Shtetit nuk ishte për vitin 2024 institucioni kryesor që referoi materiale që SPAK të niste hetime, në dallim nga viti 2023. Në raportin e dorëzuar në Kuvend për vitin që lamë pas, SPAK thotë se bashkëpunimi nga institucionet publike në lidhje me referimet e ardhura prej tyre ka nevojë ende të përmirësohet. Vetëm 15,1% të totalit të referimeve të dërguara pranë SPAK janë nga të gjitha subjektet publike dhe private.
Krahasuar më vitin 2023, Policia e Shtetit ka rënie shqetësuese të referimeve me 53,8%. Por nëse policia ka rënie, nga ana tjetër vihet re rritje e besimit të publikut te SPAK pasi shumica e referimeve kanë ardhur nga qytetarët, numri i të cilave zë rreth 37% të totalit, e rritur në masën rreth 36% nga 2023-shi.
"Gjatë vitit 2024 konstatohen në total 132 hetime të filluara me kallëzime dhe referime nga individë dhe institucione. Nga këto, hetimet e filluara me kallëzime nga shtetas dhe nga persona juridikë zënë rreth 46% të totalit për vitin 2024. Gjatë këtij vitit rezulton se hetimet e filluara me kallëzime dhe referime nga shtetas dhe persona juridikë janë rritur me rreth 36% krahasuar me vitin paraardhës. Sa më sipër rezulton se, për të tretin vit radhazi janë rritur kallëzimet nga këto subjekte, çka përkthehet në rritje të besimit të publikut tek institucioni i Prokurorisë së Posaçme. Nga ana tjetër, vërehet rënie e hetimeve të filluara me kallëzime nga policia e shtetit, nga 65 në vitin 2023 në 30 në vitin 2024", thuhet në raport.
Krimi i organizuar vijon të jetë problematik, sidomos edhe në bashkëpunimin ndërkombëtar. SPAK evidentoi 16 grupe kriminale në disa qarqe, Tiranë, Durrës, Elbasan, Shkodër, Kukës, Vlorë dhe Lezhë, 10 prej të cilëve të provuar tashmë, pjesa më e madhe në Tiranë, 3 prej tyre. Veçori e këtyre grupeve është struktura e tyre hierarkike, me ndarje rolesh, përfshirë këtu edhe anëtarë të tyre nga gjyqësori, prokuroritë, Policia e Shtetit, media dhe bota akademike. Të veçanta mbeten komunikimet në “SkyECC”, përmes së cilëve, kombinuar me prova të tjera, u identifikuan 9 grupe kriminale.
"Sipas vlerësimit të brendshëm të SPAK, janë identifikuar rreth 16 grupe kriminale me rrezikshmëri të lartë shoqërore, të cilat janë të mbështetur në lidhje familjare dhe miqësore dhe janë të përfshirë edhe në tregjet ndërkombëtare kriminale, kryesisht në trafikun e kokainës. Këto grupe janë aktive në qarqet e Tiranës, Durrësit, Shkodrës, Kukësit, Lezhës, Elbasanit dhe Vlorës. SPAK ka arritur të provojë me sukses 10 prej këtyre grupeve kriminale me aktivitete kriminale në disa qytete të vendit si Tiranë (3); Durrës (2); Elbasan (2); Shkodër (1), Lezhë (1) dhe Kukës (1). Nga veçoritë dalluese të këtyre grupeve kriminale është struktura e tyre hierarkike, ndarja e roleve, përfshirja në anëtarësinë e tyre të përfaqësuesve të gjyqësorit, prokurorisë, policisë së shtetit, medias dhe botës akademike. Disa tipare të tjera të veçorive të këtyre grupeve janë përdorimi i komunikimeve të koduara si SKY ECC dhe pastrimi i parave nëpërmjet kriptovalutave", thuhet në raport.
Sipas SPAK, gjatë vitit 2024 evidentohet rritje e sekuestrimeve, ndërsa vërehet një rënie për sa i përket numrit të konfiskimeve krahasuar me vitin 2023. 25 sekuestrime u bënë në 2024, ndërsa një vit më parë ishin 16. Te konfiskimet nga 39 që ishin në 2023-shin, në vitin që lamë pas janë gati sa gjysma, vetëm 20 prej tyre.
"Për sa i përket sekuestrimeve dhe konfiskimeve nga produktet e veprave penale të hetuara nga Prokuroria e Posaçme gjatë vitit 2024, referuar të dhënave statistikore, evidentohet rritje e numrit të sekuestrimeve sipas Kodit Penal, ndërsa vërehet një rënie për sa i përket numrit të konfiskimeve krahasuar me vitin 2023. Kjo ka ardhur për shkak se, disa nga rastet e sekuestrimeve sipas Kodit Penal kanë qenë ende në fazën e hetimit dhe në proces gjykimi, si dhe gjatë vitit 2024, nuk ka përfunduar ende procesi gjyqësor me vendim përfündimtar.
Në këto raste, gjykimi i kërkesave për konfiskimin e pasurive kryhet së bashku me gjykimin e akuzave për kryerjen e veprave penale dhe fajësinë e personave të akuzuar. Në këtë mënyrë ecuria e procedurës së konfiskimit është e varur nga ecuria e gjykimit të çështjes në themel. Gjithashtu, rënia e mësipërme i referohet numrit të rasteve, ndërkohë që vlera e pasurive të konfiskuara në vitin 2024, është më e lartë se vlera e pasurive të konfiskuara në vitin 2023", thuhet në raport.
Vlera e pasurive të sekuestruara është 2.8 miliardë lekë, krahasuar me 1.9 miliardë lekë të vitit 2023. Ndërkohë te konfiskimet vlera në 2024-ën ishte 938 milionë lekë dhe 27.2 milionë euro, me rritje në raport me 2023-shin, përkatësisht 440 milionë lekë dhe 18.3 milionë euro.
"Vlera e aseteve të sekuestruara dhe konfiskuara për vitin 2024, përllogaritet në vlerën afërsisht prej 65,5 milion euro. Këtu përfshihet vlera e aseteve të sekuestruara dhe konfiskuara në kuadër të Ligjit Anti-Mafia, Kodit Penal dhe Aktit Normativ (OFL). Nga totali rreth 36,8 milion euro është. Vlera e aseteve të konfiskuara dhe rreth 28,7 milionë euro është vlera e aseteve të sekuestruara. Vlera e pasurive të sekuestruara ka shënuar një rritje të ndjeshme në vitin 2024, prej rreth 47%, konkretisht nga 1.9 miliardë lekë në vitin 2023, në vlerën rreth 2.8 miliardë lekë në vitin 2024.
Për sa i përket pasurive të konfiskuara gjatë vitit 2024, edhe pse evidentohet rënie e numrit të pasurive të konfiskuara, nga ana tjetër evidentohet një rritje e ndjeshme e vlerës në lekë/euro të pasurive të konfiskuara krahasimisht me vitin 202325. Konkretisht vlera e pasurive të konfiskuara gjatë vitit 2024, është në vlerën rreth 938 milion lekë nga 440 milion lekë që ishte në vitin 2023, dhe 27 milion euro nga rreth 18 milion euro që ishte në vitin 2023", thuhet në raport.
Gjatë vitit 2024, volumi i punës për sa i përket çështjeve të çuara për gjykim nga Prokuroria e Posaçme, ka qenë me një trend të vazhdueshëm rritës. Në total janë 217 çështje të gjykuara apo në gjykim, krahasuar me 178 çështje të vitit 2023, duke shënuar një rritje me rreth 22%.
Gjatë vitit 2024, është dyfishuar edhe numri i rekurseve të shqyrtuara nga Gjykata e Lartë. Janë dhënë 65 vendim fajësie në GJKKO dhe 56 vendim fajësie në Apel të GJKKO, duke shënuar një rënie të lehtë të tyre, krahasuar me vitin 2023. Një rënie evidentohet gjithashtu, edhe për vendimet e pafajësisë të dhëna gjatë vitit 2024 nga GJKKO, nga 8 vendime pafajësie në vitin 2023, në 7 vendime në vitin 2024.
Kliko këtu për të lexuar dokumentin e plotë Raportin e SPAK për 2024
Komente
Keto vite, sidomos pas deshifrimit te chateve, kane sjelle shume pikepyetje per policine.Sa zyrtare policie dolen te inkriminuar? Fakti qe populli preferon me mire te denoncoje direkt ne SPAK shpjegon gjithecka.
PërgjigjuPo cfare pret Spaku qe deri tani nuk ka denuar njeri qe policia ti dyfishoje apo trefishoje denoncimet ? Po pse nuk thote per shembull qe nr i te korruptuarve eshte pergjysmuar per shembull. Tani duhet te denoncojme familjen si ne kohen e xhaxhit qe te justifikoje rrogen Spaku !!!!!!!!!
PërgjigjuA ka bandë kriminale më të madhe se ajo e Sali non gratës që SPAK smund ta hetoi.
PërgjigjuSpak ka te drejt Dursi ka banden me te fuqishme
Përgjigju