Superliga shqiptare e futbollit mbylli raundin e 11-të këtë të enjte. Dinamo barazoi për herë të tretë radhazi, këtë herë 1-1 kundër Bylis. Ndërkohë në Durrës Teuta dhe AF Elbasani barazuan 0-0.
Në stadiumin “Niko Dovana” të Durrësit ishte një ndeshe e bukur dhe e luftuar, por asnjë nga ekipet nuk siguroi dot fitoren. Elbasani i shkoi shumë afër golit në minutën e 92-të me Ze Gomes, që nuk i besoi syve, kur pa gjuajtjen e tij të ndalej mbi vijën fatale nga Jazxhi. Ky është barazimi i katërt radhazi për verdheblutë, që duket se kanë harruar si fitohet.
Nuk prodhoi fitues sfida mes Dinamos dhe Bylisit, e cila u mbyll ne barazim 1-1. Në minutën e 52-të, Ayodeji i dha avantazhin ballshiotëve, duke shënuar pas një topi të kthyer nga shtylla. Skuadra e Dedes iu afrua edhe golit të dytë, por u ndal nga tranversa. Te Dinamo nuk u dorëzua dhe i përhershmi Itodo Mandela barazoi shifrat në minutën e 68-të. Ky është barazimi i tretë radhazi për kryeqytetasit, që mbajnë vendin e tretë me 17 pikë, ndërsa Bylis renditet i fundit me 9 pikë.
Renditja pas javës së 11-të
Pas përfundimit të raundit të 11-të në Superligë, skuadrat janë duke menduar për atë pasardhës. Java e 12-të zhvillohet të diel dhe të hënë, me disa takime të rëndësishme.
Të diel në orën 14:00 luhet Egnatia - Tirana. Në 17:00 Vllaznia pret Skënderbeun në Shkodër. Ndërkohë që të hënë Bylis luan me Laçin në orën 14:00, teksa Partizani dhe Teuta përplasen në 18:00 në "Arenën e Demave". Po në 18:00 edhe AF Elbasani - Dinamo.
Superliga, java 12-të:
E diel, 03 nëntor 2024
14:00 Egnatia - Tirana
17:00 Vllaznia - Skënderbeu
E hënë, 04 nëntor 2024
14:00 Bylis - Laçi
18:00 AF Elbasani - Dinamo
18:00 Partizani - Teuta
Pas raundit të 11-të kryeson Partizani me 20 pikë, dy më shumë se Vllaznia ndjekëse. Në fund Laçi dhe Bylis.
