ROMË – Bazilika "Shën Maria e Madhe" është kthyer në një nga vendet më të vizituara të Romës pas varrosjes së Papa Françeskut. Prefekti i Romës, Lamberto Giannini, deklaroi sot se prania e vizitorëve është dhjetëfishuar dhe se që nga mëngjesi janë regjistruar rreth 30 mijë hyrje në bazilikë.
Për shkak të fluksit të madh, nga altari u bë një njoftim ku kërkohej që ata që kishin vizituar varrin të largoheshin menjëherë për të respektuar masat e sigurisë. Hyrjet në bazilikë u pezulluan përkohësisht dhe po vlerësohet ndërhyrja e policisë bashkiake për menaxhimin e situatës.
Personeli i bazilikës dhe xhandarmëria vatikanase po drejtojnë vizitorët drejt varrit të Papa Françeskut, i cili është varrosur pranë Papa Honorius III.
Françesku është papa i tetë i varrosur në Santa Maria Maggiore. Në bazilikë ndodhet gjithashtu edhe varri i Papa Nikollës IV.
Lajmi në përditësim...
Homazhet për Papa Françeskun vijojnë të jenë të pandërprera edhe pas ceremonive zyrtare. Situata sot para Bazilikës së Shën Pjetrit në Vatikan paraqitet me praninë e një numri të madh njerëzish, që vazhdojnë të vijnë për të nderuar Atin e Shenjtë të ndarë nga jeta.
Fotot nga vendi janë sjellë në Report Tv nga Ndue Lugja, restaurator dhe piktor shqiptar me një përvojë 27-vjeçare në Vatikan. Lugja, i cili ka takuar dhe njohur personalisht tre papë edhe Papa Françeskun, shprehet se ky grumbullim i madh njerëzish tregon dashurinë e thellë që besimtarët dhe vizitorët nga e gjithë bota kanë për Papën.
Komente
