Sarandë- Vihen sekuestro mbi 3 pasuri të paluajtshme në pronësi të një personi në Sarandë dhe që dyshohet se e kanë burimin nga veprimtaritë kriminale nga trafiku i drogës.
Këto asete i përkasin Romeo Lazes dhe Policia e Vlorës konfirmoi kryerjen e sekuestrimit ditën e ssotme (13 mars).
Ekzekutimi u bë nga Seksioni Kundër Krimit Ekonomik, në bashkëpunim me Prokurorinë e Sarandës.
Nën sekuestro u vendosën konkretisht një ndërtesë me sipërfaqe 21 m2, një truall me sipërfaqe 100 m2 dhe një subjekt tregtar lavazh dhe tregti automjetesh.
Njoftimi i Policisë së Vlorës:
"Seksioni për Hetimin e Krimeve Ekonomike dhe Financiare, i DVP Vlorë, në bashkëpunim me Prokurorinë e Sarandës, në vijim të punës për evidentimin dhe sekuestrimin e pasurive të përfituara nga veprimtari të paligjshme/kriminale, në kuadër të luftës kundër korrupsionit dhe krimit të organizuar, pas një pune të detajuar hetimore dhe gjurmuese, ka ekzekutuar vendimin për sekuestrimin e disa pasurive të dyshuara me burim kriminal.
Në këtë kuadër, u vu sekuestro mbi pasuritë e shtetasit R. L., 44 vjeç, banues në Sarandë, me precedent penal në fushën e narkotikëve, konkretisht:
• 1 ndërtesë me sipërfaqe 21 m²;
• 1 truall me sipërfaqe 100 m²;
• 1 subjekt tregtar me fusha veprimtarie lavazh dhe tregti automjetesh.
Hetimet vijojnë për të zbuluar burimin e këtyre pasurive të shtetasit R. L. Materialet procedurale i kaluan Prokurorisë së Sarandës, për veprime të mëtejshme".
Komente
