Sarandë- Një çift nga Maqedonia e Veriut, që hiqeshin si pushues në bregdetin e Sarandës, vodhën turisten nga Greqia dhe tentojnë arratisjen.
Por policia vendore i ka pikasur pas denoncimit, duke i lokalizuar dhe më pas arrestuar sot (23 Gusht), pas gjashtë ditësh kërkime. Si prova materiale janë marrë edhe pamjet nga kamerat e sigurisë, kur të dyshuarit largohen pas krimit.
Të arrestuarit janë David Shapurikj dhe Sandra Neshkovska, 24 dhe 28 vjeç, banues në Maqedoninë e Veriut. Policia bëri me dije se ata arritën t’i vidhnin pushueses së huaj çantën personale me 2 celularë, 3 palë syze, portofolin me para dhe sende të tjera personale.
Ngjarja ka ndodhur më 17 Gusht të këtij viti te plazhi i njohur si “Pema e Thatë” në Sarandë dhe ditën e sotme u bë arrestimi i tyre.
“Gjatë aksionit u sekuestrua edhe makina e dy të dyshuarve. Po vijojnë hetimet për të zbardhur vjedhje të tjera që mund të kenë kryer këta shtetas”, bëri me dije policia vendore.
Pas veprimeve paraprake proceduriale, dosja i kaloi prokurorisë, për veprën penale “vjedhja”, kryer në bashkëpunim, teksa çifti i dyshuar po merret në pyetje.
