Kryeministri Edi Rama thotë se Komisioni i Posaçëm Antikorrupsion ishte rezultat i një ndjenje alarmi të brendshëm përballë sfidës së negociatave. Ai tha se nuk është qeveria e Shqipërisë ajo që negocion me BE, por shteti shqiptar, dhe për këtë arsye, institucionet duhet të jenë të koordinuara dhe të japin llogari në parlament.
“Komisioni i Posaçëm ka qenë rezultat i një ndjenje alarmi të brendshëm përballë gjithë malit të negociatave dhe përballë sfidës së jashtëzakonshme institucionesh dhe burimesh në funksion të negociatave. Nuk negocion qeveria e Shqipërisë me BE, negocion i gjithë shteti shqiptar, një numër i madh institucionesh të pavarura agjencish dhe nevoja që skuadër kombëtare të jetë e koordinuar është themelore. Përpara kujt do të përgjigjet cilido nga institucionet që nuk performon si duhet në tryezën e negociatave. Përpara qeverisë nuk është e mundur, qeveria përgjigjet për veten e vet, dhe qeveria jep llogari në parlament nëse nuk është duke përmbushur një objektiv të këtij procesi historik. Të gjithë duhet t’i referohen kuvendit. Celebrimi i atyre që kemi arritur është i lehtë, por përmirësimi dhe adresimi i çfarë kemi mësuar në 10 vjet se nuk shkon është i vështirë dhe nuk mund të ketë përmirësim nëse nuk kontribuojnë të gjithë nga këndvështrimi i tyre se si duhen prekur ligjet dhe duhet ndërhyrë në ngrehinën që kemi ngritur së bashku dhe që të funksionojë më mirë.”, u shpreh kryeministri.
Kreu i qeverisë tha se sfidë mbetet pakthyeshmëria e reformës në drejtësi, ndërsa shtoi se vetëm me hyrjen në BE, institucionet e saj do të mbeten të paprekura.
“Garantimi i pakthyeshmërisë i reformës në drejtësi është sfida e sfidave. Kur të hyjmë në BE, nuk është më alarm, por deri kur të hyjmë në BE duhet të jetë një alarm i vazhdueshëm që reforma në drejtësi të jetë e pakthyeshme, që institucionet e drejtësisë të jenë të paprekshme. Këto gjëra kanë ndodhur në historinë e Shqipërisë më shumë se një herë dhe s’ka arsye. Prandaj është i rëndësishëm ky komision dhe që pakthyeshmëria të jetë një nga pikat kyçe të referimit tonë.”, tha Rama.
Lajmi kryesor:
Rama: Sot drejtësia heton e dënon kë të dojë, sfidë pakthyeshmëria e reformës! E dimë që Unioni nuk është ‘bankomat’, dera mund të mbyllet
Xh.D/I.M/ReportTv.al
