Vlorë- Dy persona janë vendosur në pranga nga policia e Vlorës pasi siguronin euro të falsifikuara dhe i fusnin në treg. Ndërkohë një tjetër do të hetohet në gjendje të lirë.
Siç bëhet me dije në njoftimin e policisë të rinjtë në bashkëpunim me njëri-tjetrin, ushtronin aktivitet të kundërligjshëm të shpërndarjes së kartëmonedhave të falsifikuara në qytetin e Vlorës.
Dyshohet se 24-vjeçari siguronte kartëmonedha false nga dy të arrestuarit dhe më pas i fuste në treg duke i përdorur për blerje në biznese të ndryshme të zonës.
“Si rezultat, u arrestuan në flagrancë shtetasit:
J. T., 25 vjeç, banues në Skrapar;
B. S., 35 vjeç, banues në Përmet.
U procedua në gjendje të lirë shtetasi T. K., 24 vjeç, banues në Vlorë”, thuhet më tej në njoftim.
Operacioni u kodua “Fake Cash”.
Gjatë operacionit u sekuestrua një shumë prej 2550 eurosh të dyshuara të falsifikuara, në prerje 50 dhe 100 euro.
Materialet iu referuan Prokurorisë për veprime të mëtejshme.
Komente
