Ministria e Mbrojtjes nëpërmjet Emergjencave Civile ka njoftuar se është bërë e mundur shuarja e plotë e zjarreve në fshatin Pilur të Himarës dhe në Kolsh të Kukësit, dy prej vatrave më problematike të raportuara gjatë orëve të fundit.
Sipas Ministrisë së Mbrojtjes, në total janë 13 vatra zjarri në disa qarqe të vendit.
Në terren kanë qenë të angazhuara 118 forca operacionale, 22 automjete zjarrfikëse dhe mjete të tjera ndihmëse.
Sipas informacioneve situata e zjarreve është si mëposhtë:
Një zjarr i përmasave të konsiderueshme ka përfshirë pasditen e sotme një sipërfaqe të madhe me bimësi dhe shkurre në zonën e Zvërnecit, në qytetin e Vlorës. Për shkak të temperaturave të larta dhe erës së fortë, flakët janë përhapur me shpejtësi, duke rrezikuar edhe disa banesa që ndodhen në afërsi të zonës së zjarrit.
Në vendngjarje kanë mbërritur me urgjencë forcat zjarrfikëse me tre automjete, të cilat po punojnë intensivisht për të izoluar vatrat e zjarrit dhe për të parandaluar përhapjen e flakëve drejt banesave dhe zonave të banuara. Për shkak të terrenit të vështirë dhe përmasave të zjarrit, në ndihmë të zjarrfikësve ka shkuar edhe një automjet i ujësjellësit, i cili po ndihmon në furnizimin me ujë të forcave në terren.
Po ashtu, banorë të zonës i janë bashkuar përpjekjeve për të lokalizuar flakët dhe për të mbrojtur pronat dhe banesat e tyre. Ata po punojnë me mjete rrethanore për të ndihmuar në shuarjen e zjarrit deri në momentin që situata të vihet nën kontroll.
Shkaqet e zjarrit nuk janë përcaktuar ende, por dyshohet se mund të bëhet fjalë për zjarrvënie të qëllimshme, një fenomen që, fatkeqësisht, është përsëritur në disa zona të bregdetit dhe të pyjeve në jug të vendit gjatë ditëve të fundit.
Aktualisht, përpjekjet për shuarjen e flakëve vijojnë, ndërsa autoritetet lokale dhe emergjencat civile bëjnë thirrje për kujdes të shtuar, duke kërkuar nga qytetarët që të mos ndërmarrin veprime të papërgjegjshme që mund të përkeqësojnë situatën.
Komente
