VLORË - Pas humbjes 0-2 që Flamurtari pësoi në Vlorë kundër Besës të shtunën (5 prill), tifozët vendas u futën në fushë dhe goditën miqtë nga Kavaja.
Në sulmin e tyre, disa tifozë vlonjatë kanë goditur trajnerin kundërshtar, Emiljano Çela. Tekniku i Besës akoma nuk ishte larguar nga fusha, ndërsa lojtarët e Besës po festonin suksesin pas fërshëllimës së arbitrit Enea Jorgji.
Në përleshje ndërhynë edhe lojtarët e tjerë dhe personat përgjegjës për sigurinë. Paçka se Forcat e Ndërhyrjes së Shpejtë (FNSH), policia apo edhe siguria private ishin prezente në stadium, ata nuk mundën të izolonin tifozët që kaluan gardhet rrethuese me fushën dhe u bënë protagonistë me dhunën e shkaktuar.
Kujtojmë se në Vlorë ishin përgatitur për festë, ndërsa tifozët hodhën edhe sende të palejuara gjatë lojës. Humbja e Flamurtarit bën që ekipi kuqezi të mbetet në vendin e dytë të Kategorisë së Parë dhe të kërkojë të mbetet në këtë pozitë edhe gjatë dy javëve të mbetura të sezonit, duke siguruar një biletë direkte për Superligën dhe shmangien e zonës play-off.
Pamjet pas ndeshjes Flamurtari-Besa kalojnë çdo limit. Trajneri i kavajsve Emiljano Çela, jo vetëm që u godit nga tifozët vlonjat të cilët pushtuan fushën, por edhe është sulmuar me mjete rrethanore. Siç tregon kjo foto, nga tribuna VIP e stadiumit Flamurtari, në drejtim të ish-trajnerit të vlonjatëve, është gjuajtur edhe me karrige. Fatmirësisht për Çelën nuk ka patur asnjë dëmtim, ndërsa forcat e shumta të policisë si para, gjatë dhe pas ndeshjes nuk kanë mundur ti shmangin këto incidente.
Komente
