SARANDË-Një operacion antidrogë është zhvilluar në Sarandë, për goditjen e një grupi të dyshuar për trafik droge, hetimet ndaj të cilit kanë nisur që prej vitit 2020.
Operacioni antidrogë po bëhet nga Prokuroria e Gjirokastrës pas referimit nga SPAK. Prej orëve të para të mëngjesit, forcat policore kanë kryer kontrolle në disa banesa.
Hetimet kanë nisur nga SPAK, por çështja për moskompetencë i ka kaluar më pas Prokurorisë së Gjirokastrës. Operacioni është shtrirë në Sarandë dhe Delvinë. Mësohet se janë shoqëruar 3 persona në Sarandë, si dhe 9 persona në Delvinë.
Në Sarandë është ndaluar Bledar Haderi, me precedentë penale, me masë sigurimi “Arrest në burg”, Gelbert Koshi me masë sigurimi “Arrest në shtëpi” dhe Dhurim Logli me masë sigurimi “Detyrim për t’u paraqitur në policinë gjyqësore”.
Ndërsa dy prej të ndaluarve në Delvinë janë Markelian Alinani, trajner i ekipit “Bistrica”, me precedentë të shumtë penale dhe Orges Kalo.
Gjatë operacionit janë sekuestruar edhe disa celularë që dyshohet se përdoreshin për aktivitetin kriminal.
Sipas një njoftimi të Prokurorisë së Gjirokastrës, janë lëshuar 10 masa sigurie për trafik droge, organizim lojërash fati si edhe për përkrahje të autorit dhe moskallëzim krimi.
'Prokuroria pranë Gjykatës së Shkallës së Parë të Juridiksionit të Përgjithshëm Gjirokastër mbi bazën e materialeve të referuara nga ana e Prokurorisë së Posaçme Kundër Korrupsionit dhe Krimit të Organizuar ka regjistruar procedimin penal nr. 748 datë 19.12.2024 për veprat penale ‘’Prodhim dhe shitja e narkotikëve’’ e kryer në bashkëpunim, ‘’Organizimi ose ushtrimi i veprimtarive të lojrave të fatit në kundërshtim me ligjin’’, ‘’Përkrahje e autorit të veprës penale’’ dhe ‘’Moskallëzim Krimi’’ parashikuar nga neni 283/2, 197, 302 dhe 300 i Kodit Penal. Nga hetimi dhe ndjekja me metoda speciale të hetimit në datën 01.03.2025, Prokuroria pranë Gjykatës së Shkallës së Parë të Juridiksionit të Përgjithshëm Gjirokastër i është drejtuar Gjykatës së Shkallës së Parë të Juridiksionit të Përgjithshëm Gjirokastër, e cila ka miratuar kërkesën e Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër për caktimin e masave të sigurimit personal për 10 shtetas si dhe kontrollin e një subjekti lokal.
Në datë 04.03.2025 u bë ekzekutimi i masave si më poshtë: ‘’Arrest me burg’’ për shtetasit Bledar Haderi, Markelian Alinani, E.S. ’’Arrest në shtëpi’’ për shtetasit I.A., Gelbert Koshi, ’’Ndalimi i daljes jashtë shtetit’’ dhe ’’Detyrimi për t’u paraqitur në policinë gjyqësore’’ për shtetasit D.H., Dhurim Logli. Janë shpallur në kërkim shtetasit B.H., D.H., dhe E.P', thuhet në njoftim.
Komente
