TIRANË- Forca të shumta operacionale, të koordinuara nga Antidroga e Tiranës, në këto pamje bastisin një prej lokaleve të ish-Bllokut, në të cilin kokaina dhe kanabis sativa shërbeheshin si kafe normale.
Me urdhër ekzekutimi të firmosur nga Gjykata e Tiranës, blutë gjetën drogë dhe armë nëpër çantat marsup të disa personave në operacionin “Bllok 33”.
Në total u udhëruan 33 arreste, ndërsa policia mundi të prangosë 25 prej tyre, njëri prej të cilëve në masën “arrest shtëpie”. Ndërkohë po punohet për gjetjen dhe arrestimin e 8 të mbeturve, tashmë në kërkim.
Dy prej personave kryesor të arrestuar, të cilët dyshohet se siguronin lëndën narkotike, e cila më pas shpërndahej në doza, janë vëllezërit Durim dhe Artur Gurzi, 46 dhe 41 vjeç. Përveç kokainës që iu gjet në banesat e tyre, sirtarëve iu sekuestruan edhe rreth 20 mijë euro.
Report Tv mësoi përmes burimeve se grupet kriminale e shpërndanin dhe shisnin drogën në lokalet më të famshme të zonës së ish-Bllokut, Selitë dhe Shkollë të Bashkuar. Në mesin e të arrestuarve ka banakierë dhe kamerierë, pasi dyshohet se ishin të përfshirë në aktivitetin e paligjshëm. Klientët ishin persona VIP dhe frekuentuesit e jetës së natës.
Gjatë kontrolleve të kryera së fundmi, u gjetën dhe sekuestruan 1 kg e 964 gramë kokainë, 450 gramë heroinë, 2 pistoleta, 29 celularë, 6 automjete, 4 peshore elektronike dhe shuma të konsiderueshme parash.
Më herët, gjatë hetimeve disamujore, janë prangosur edhe 9 të tjerë, duke e çuar në 42 numrin në total të personave të hetuar dhe 85 kilogramët e kanabisit të sekuestruar.
Njoftimi i Policisë së Tiranës:
"Finalizohet pas disa muajsh hetime me metoda proaktive, megaoperacioni i koduar “Blloku 33”.
Goditen disa grupe kriminale që shitnin doza të drogave të forta në lokalet e natës në zonën e Ish-bllokut. Gjatë periudhës hetimore janë identifikuar 42 shtetas, pjesëtarë të grupeve që ushtronin këtë veprimtari kriminale.
Nga 33 masa sigurie që ka caktuar Gjykata, u ekzekutuan 25 prej tyre (masa e sigurisë “Arrest në burg”, për 24 shtetas, dhe masa e sigurisë “Arrest në shtëpi”, për 1 shtetas). Ndërkohë, vijon puna për kapjen e 8 shtetasve të tjerë.
Sekuestrohen 1 kg e 964 gramë Kokainë, 450 gramë Heroinë, 2 armë zjarri pistoleta, 29 celularë, 6 automjete, 4 peshore elektronike dhe shuma të konsiderueshme parash. Gjatë periudhës hetimore janë arrestuar 9 shtetas dhe janë sekuestruar 85 kg lëndë e dyshuar narkotike Cannabis Sativa.
Si rezultat i veprimeve hetimore të kryera me metoda proaktive për disa muaj, nga Seksioni për Hetimin e Narkotikëve, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm, u finalizua në bashkëpunim me Forcën e Posaçme Operacionale të DVP Tiranë, operacioni policor i koduar “Blloku 33”, për goditjen e disa grupeve kriminale që shitnin doza kokaine dhe heroine, në lokalet e natës në zonën e Ish-bllokut.
Në kuadër të këtij operacioni, u ekzekutuan masat e sigurisë:
-“Arrest në burg”, për shtetasit A. H., 31 vjeç, D. G., 46 vjeç, A. G., 41 vjeç, E. S., 23 vjeç, J. B., 43 vjeç, A. H., 22 vjeç, S. J., 23 vjeç, M. A., 35 vjeç, G. K., 24 vjeç, A. Sh., 36 vjeç, E. M., 29 vjeç., Xh. R.(H)., 30 vjeçe, V. Q., 53 vjeç, M. Xh., 24 vjeç, A. Sh., 41 vjeç, L. D., 21 vjeç, J. R., 30 vjeç, E. Rr., 30 vjeç, K. S., 22 vjeç, B. D., 35 vjeç., K. T., 21 vjeç, S. D., 19 vjeç, A. D., 28 vjeç dhe L. K., 27 vjeç, të gjithë banues në Tiranë;
-“Arrest në shtëpi”, për shtetasin F. K., 30 vjeç, banues në Tiranë.
Gjatë kontrollit fizik ndaj këtyre shtetasve dhe kontrollit në banesat e tyre janë gjetur dhe sekuestruar: 1 kg e 964 gramë lëndë e dyshuar narkotike Kokainë, 450 gramë Heroinë, 2 armë zjarri pistoleta, 29 celularë, 6 automjete, 4 peshore elektronike dhe shuma të konsiderueshme parash në lekë dhe euro, që dyshohet se janë përfituar nga kjo veprimtari kriminale.
Në kuadër të operacionit janë shpallur në kërkim 8 shtetas të tjerë, të cilët janë identifikuar gjatë periudhës hetimore, si të përfshirë në këtë veprimtari kriminale. Vijon puna për kapjen e tyre dhe për dokumentimin e plotë të kësaj veprimtarie kriminale. Materialet procedurale iu referuan Prokurorisë së Tiranës, për veprime të mëtejshme".
Këto janë pamjet kur Policia e Tiranës finalizon një fraksion të operacionit të saj të koduar ‘Blloku 33” gjatë orëve të fundit në zemër të kryeqytetit.
Ky është momenti i aksionit me blerje të simuluar të drogës tek shpërndarësit në zonën e ish-Bllokut.
Pamjet janë filmuar për efekte dokumentare dhe Policia i ka bërë publike një pjesë të tyre. Në çastet që bëhet shkëmbimi i dozave me shumën e lekëve që duhej paguar, veprime në rrugë ku qartazi dallohen kalimtarë e shitës, agjentët kanë vepruar me forcat e rendit duke rrethuar të rinjtë dhe vendosur prangat.
Deri tani organizata evidentohet se ka pasur 42 anëtarë, nga të cilët 34 janë arrestuar dhe 8 të tjerë janë shpallur në kërkim. Në goditjen e fundit janë arrestuar 25 persona me vendim gjykate, në total 33 masa sigurie, teksa të tjerët kanë qenë të proceduar më parë. Në total janë sekuestruar rreth 90 kg drogë, kurse në goditjen e fundit rreth 2 kg kokainë dhe rreth gjysmë kg hashash, peshore, telefona, makina e shuma lekësh.
Durim dhe Artur Gurzi
Këta janë dy vëllezërit Artur dhe Durim Gurzi, të arrestuar në kuadër të operacionit të koduar “Blloku 33”, kundër një organizate të trafikut dhe shpërndarjes së lëndëve narkotike në lokalet e natës më të njohura në kryeqytet dhe rrethina.
Të dy dyshohen si krerët e grupit kriminal me 42 anëtarë, nga të cilët së fundmi u prangosën 25 prej tyre dhe 8 u shpallën në kërkim.
Në kërkim mësohet se është edhe vëllai i tretë i tyre. Vëllezërit dyshohen si furnitorët me lëndë narkotike të shpërndarësve në zonën e ish-Bllokut. Shumë nga të arrestuarit janë banakierë dhe kamerierë lokalesh, teksa një prej tyre është femër.
Komente
Te gjithe bodigardet e diskove shesin droge.....policia ti pergjoje.....
Përgjigju