Ashensorët e pallateve po kthehen në problematikë shqetësuese për banorët pasi pësojnë defekte nga më të ndryshmet. Nga mbrëmja e djeshme deri në mesditën e sotme janë raportuar 3 raste të ashensorëve që janë përfshirë nga flakët apo është këputur kabulli.
Pasditen e sotme, ka rënë zjarr në një prej ashensorëve te një kompleks në "Rrugën e Kavajës" në Tiranë. Një incident i ngjashëm ka ndodhur rreth orës 13:45 në ashensorin e një pallati në lagjen "1 maji" në Vlorë. Në asnjërin prej rasteve nuk ka rrezik për banorët, por vetëm dëme materiale. Grupi hetimor ndodhet në vendngjarje dhe po punon për zbardhjen e rrethanave të ngjarjes dhe përcaktimin e shkakut të rënies së zjarrit.
Një tjetër ngjarje e rëndë me rast defektet në ashensor ndodhi edhe mbrëmë në ambientet e QSUT në Tiranë, ku u shkëput një nga kavot e ashensorit, duke lënë të plagosur barrelistin dhe një paciente.
Një ngjarje e rëndë ndodhi më 12 shtator të vitit të kaluar në zonën Astirit në Tiranë. 2 gra mbetën të plagosura, pasi u shkëputën kavot e një ashensori nga një pallat në zonën e Astrit. Ato ishin brenda ashensorit, kur kabulli i tij është shkëputur dhe është përplasur me fuqi në katin e parë. Njëra prej të plagosurave ishte shtatzënë.
