Në konferencën për shtyp me Kryeministrin britanik Keir Starmer, Presidenti amerikan Donald Trump tha se SHBA kërkon të rimarrë mbrapsht bazën ajrore në Afganistan.
Sipas Trump, baza ajrore e Bagramit është një vend strategjik sepse ndodhet 1 orë larg vendit ku Kina prodhon armët e saj bërthamore.
“Po përpiqemi ta rimarrim atë. Po përpiqemi ta rimarrim sepse ata (afganët) kanë nevojë për gjëra nga ne. Ne e duam atë bazë të kthehet. Por një nga arsyet pse e duam bazën është, siç e dini, se është një orë larg nga vendi ku Kina prodhon armët e saj bërthamore”, u shpreh Donald Trump gjatë konferencës me Starmer në vizitën zyrtare në Britani të Madhe.
Kujtojmë se trupat amerikane u larguan nga Afganistani në një situatë kaotike në gusht të vitit 2021, kur SHBA nënshkroi marrëveshje me talebanët të cilët morën kontrollin e shtetit.
Baza ajrore e Bagramit ka qenë pika kyçe e SHBA-së në pushtimin 20-vjeçar të Afganistanit.
Lajmi kryesor:
Trump: Mos blini më naftë ruse, Putin do të tërhiqet! Starmer: Ushtro më shumë presion ndaj liderit rus
V.GJ /ReportTv.al
