STAMBOLL- Në Turqi janë duke vazhduar procedurat për Harun Celik i cili pas dënimit në Shqipëri për falsifikim dokumentesh u dëbua në shtetin turk më 1 janar të këtij viti. Sipas mediave turke të cilët e konsiderojnë Harun Çelik si pjesëtarë të organizatës 'FETO', ai u dërgua në Turqi përmes një operacioni të Agjencisë Kombëtare të Inteligjencës (MIT).
Siç raporton Anadolu Agency (AA) mësohet, se pas dorëzimit në Departamentin e Antiterrorit pranë Policisë së Stambollit, i dyshuari po i nënshtrohet procedurave dhe në ditët në vijim do të transferohet në gjykatë.
Çelik kërkohej në kuadër të një hetimi të Kryeprokurorisë Publike të Stambollit. Çelik më herët ka qenë i dënuar 8 muaj në Shqipëri, pasi u arrestua në aeroportin 'Nënë Tereza' për veprat penale "falsifikim i letërnjoftimeve, i pasaportave ose i vizave" dhe "falsifikimi i dokumenteve".
