Mënyra sesi ushqehemi është shumë e rëndësishme sidomos në kushtet e temperaturave ekstreme me të cilat po përballemi. Ekspertët thonë se duhet konsumuar minimalisht 2 litra ujë në ditë dhe gatime të lehta.
Në këto ditë kur temperaturat e larta kanë arritur rekorde kujdesi për mënyrën se si ushqehemi është bërë shumë më i rëndësishme. Kryefjala është hidratimi dhe çfarë zgjedhim të konsumojmë.
Nutricionistja Arlinda Garuci tregon se në valën e të nxehtit minimalisht duhet të konsumojmë 2 litra ujë në ditë dhe të ushqehemi sa më shëndetshëm me gatime sa më të lehta dhe konsumimin e fruta-perimeve.
“Dy litra ujë në ditë. Duhet të kemi dhe një florë intensinal bakterial të shëndetshme duke qenë se stina e verës dhe mbi të gjitha sjell dhe viroza tipike të kësaj stine. Kështu që kos, dhallë dhe gjithashtu lëngjet e përftuara nga shtrydhja e freskët e fruta-perimeve në format e smuthit duke privilegjuar fruta-perimet e kësaj stine të cilat kanë dhe një masë ujore të lartë veç energjisë që na japin. Përsa i përket vakteve kryesore të përdorim sa më shumë drithëra integral në masën e duhur. Proteina më shumë do këshilloja pulë apo peshk apo më pak mishin e kuq sidomos personat që vuajnë nga sëmundje kardiovaskulare,” tha nutricionistja Arlinda Garuci.
Neglizhenca ndaj këtyre rekomandimeve thotë nutricionistja sjell, lodhje, dehidratim dhe skuqje të syve.
“Bëhet problematike në sensin e lodhjes, pafuqisë. Patjetër kemi një djersitje, kështu që me lëngjet e tepërta nxjerrim dhe lëngjet e mira të cilët duhet t’i zëvëndësojmë”, u shpreh nutricionistja.
Kujdes duhet pasur gjithashtu me konsumimin e akulloreve . Jo çdo ditë dhe në masë të konsiderueshme.
“Kanë shumë sheqer, gjalpë. Sidomos kur temperaturat janë shumë të larta trupi ka më shumë nevojë pë sheqer natyral sesa industrial,” tha nutricionistja.
Mjekët rekomandojnë evitimin e ekspozimit në oraret e pikut kryesisht për fëmijët dhe të moshuarit të cilët janë më të rrezikuar nga shqetësimet që sjellin temperaturat e larta dhe goditjet e vapës.
