Tirana dhe Partizani luajnë të diel duke nisur nga ora 19:00 në "Air Albania". Derbi i kryeqytetit është i 176-ti në histori mes tyre, me peshoren që anon nga "Demat". Nesër sfida vlen për javën e 15-të në Superliga dhe pozitat e Tiranës nuk janë të favorshme.
Për mediet foli Gugash Magani, trajneri që vetëm pak javë më parë zëvendësoi Bledi Shkëmbin në stolin e Tiranës. Sipas tij, ekipi i ka kapacitetet për të dalë me tri pikë kundër Partizanit. Një plus sipas tij është edhe fakti që tifozët e Tiranës do jenë në stadium, pas "amnistisë" nga apeli.
"Ka kohë që skuadrat janë në aktivitet, është pranë mesi i fazës së dytë dhe skuadrat janë gati. Ky derbi ka rivalitet historik në fushë dhe tribuna. Derbi ka qenë gjithmonë i luftuar dhe nuk vlen renditja. Tirana futet në fushë për të fituar ndeshjen, si të barabartë dhe sfida vlen tri pikë. Mua nuk më tremb asgjë, kam të gjitha kapacitetet që të futem në lojë me motivin dhe mentalitetin fitues. Për shkak të eksperiencës, një ndeshje nuk i ngjan tjetrës. Te ne ekipi është me këmbë në tokë dhe gati për çdo ndeshje, jo vetëm me Partizanin.
Presioni - Duket që presioni është mbi ne pasi Partizani është në klasifikim shumë mirë, ndërsa ne jo në pritshmëritë që ka klubi. Kjo nuk do të thotë që presionin ta kthejmë në frikë, e kthejmë në motivim. Mos kalojmë në aventurë, të kemi kontrollin dhe vlerësojmë situatat.
Tifozët - Janë adrenalina e ekipit, për shkak të organizimit që kanë meritojnë komplimenta. Rikthimi i tifozëve është një plus për ne", tha Gugash Magani.
Pas 14 javëve të para të sezonit, Partizani me 27 pikë mban kreun e renditjes, ndërsa Tirana me 15 pikë ndodhet në vendin e shtatë.
Historia e derbit
175 takime janë luajtur deri tani mes Partizanit dhe Tiranës në periudhën 1947-2024 në të gjitha kompeticionet; Kupë dhe kampionat. Partizani ka fituar më shumë sesa Tirana në derbi, plot 73 ndeshje.
Bardheblutë numërojnë 47 fitore, ndërkohë që 55 ndeshje të tjera janë mbyllur në barazim.
Partizani nuk humbet në derbi që nga dhjetori i vitit 2022, kur i mposhte Xhixha me një paraqitje fantastike dhe dopietë. Dueli i fundit mes tyre, ai i këtij sezoni për javën e gjashtë u mbyll 0-0 më 21 shtator 2024 në "Air Albania".
