Zjarri i rënë dy ditë më parë në fshatin Malaj të Mirditës, vijon të jetë aktiv, ndërsa përpjekjet për shuarjen e tij u intensifikuan. Në ndihmë të strukturave vendore janë angazhuar edhe 30 forca ushtarake, me fokus kryesor mbrojtjen e banesave në zonat e rrezikuara.
Ndërkohë, për shkak të terrenit të thyer malor që ka vështirësuar ndërhyrjen nga toka, Mbrojtja Civile në Prefekturën e Lezhës ka kërkuar mbështetje me ndërhyrje nga ajri, me qëllim vënien nën kontroll të këtij zjarri.
Pas ndërhyrjes së avionit Canadair nga Kroacia, me 11 rrugë në orët e mesditës të së shtunës, u arrit vendosja nën kontroll e vatrës së zjarrit.
Por forcat zjarrfikëse dhe ato të emergjencave civile po vijojnë kontrollin e gjithë perimetrit për të shmangur çdo rindezje të flakëve.
Sipas të dhënave, deri tani janë djegur dhjetëra hektarë pyll më pisha, por fatmirësisht është arritur të shpëtohet prona e qytetarëve.
Ende nuk dihen shkaqet e këtij zjarri, i cili u shfaq mesditën e së enjtes, ndërsa kjo është vatra e vetme aktive në territorin e Qarkut e Lezhës.
Lajmi kryesor:
7 vatra zjarri aktive në vend, kritike situata në Finiq, rrezikohen 3 fshatra, banorët evakuohen vullnetarisht! Flakë në Bolenë pranë shtëpive
V.GJ /r.k./ReportTv.al
