Vlorë - Mungesa e asfaltimit të rreth 20 km rrugë në zonën e Smokthinës në bashkinë e Selenicës, po mban peng zhvillimin e turizmit në fshatrat që përshkon kjo rrugë me asete të shumta natyrore. Banorët protestuan sërish duke kërkuar realizimin e premtimit të dhënë, teksa bashkia mban sytë nga qeveria për garantimin e investimit të plotë.
***
Banorët e disa fshatrave në zonën e Smokthinës bllokuan sërish këtë të dielë rrugën e Lumit të Vlorës, që lidh qytetin me zonën e Himarës.
Për gati 30 minuta ata protestuan për të kërkuar që rruga e cila lidh 6 fshatrat e tyre me aksin kombëtar të asfaltohen, duke i hapur rrugë zhvillimit të turizmit dhe investimeve në shërbim të tij në këtë zonë.
Sipas banorëve, prej vitesh rruga prej rreth 20 km është investim i premtuar në çdo fushatë, ndonëse asnjë herë nuk u bë realitet.
“Ne duam vetëm rrugën, asgjë tjetër. Pa rrugë nuk kemi mundësi të zhvillojmë fshatin tonë”.
Edhe pse me rrugën që e vështirëson mbërritjen atje, asetet turistike që ofron zona tërheqin gjithnjë e më shumë vizitorë. Sot, këta të fundit mbetën për disa minuta pengje të protestës e cila në thelb kërkon pikërisht më shumë mundësi për vetë vizitorët.
“Erdhëm për të vizituar zonën, por u bllokuam. Megjithatë mezi presim ta shohim, sapo rruga të hapet.”
Për Report Tv, kryebashkiaku i Selenicës, Nertil Bellaj, deklaroi se bashkia do të nisë me fondet e saj asfaltimin, por vetëm për një pjesë.
“Do të fillojmë me 3.5 km që mund t’i mbulojmë me fondet e bashkisë. Rruga ka nevojë për investim të madh, sepse është degraduar prej vitesh. Jemi duke kërkuar mbështetje nga qeveria për vazhdimin e saj”.
Kjo është protesta e dytë që këta banorë dalin në protestë për asfaltimin e rrugës së fshatrave të tyre. Në protestën e parë, banorët deklaruar se investimi i rrugës ishte një premtim elektoral, por tashmë është lënë në harresë.
Komente
Po voten kujt ia dhane?
PërgjigjuGjërat bazë të jetesës po kërkojnë RRUGË,RRUGË,RRUGË.... Prandsj largohen nga fshatrat dhe marin rrugët e botës RRUGË,UJI....nuk po kërkojnë bukë se e nxjerin vetë.
Përgjigju