Babë e bir kanë rënë në pranga të Policisë së Vlorës të akuzuar për veprën penale të armëmbajtjes pa leje.
Bledar Kristo dhe Kreshnik Kristo (babë e bir), kishin fshehur në banesën e tyre në fshatin Mifol, 1 armë zjarri automatike me fishek në fole gati për qitje, 1 krehër me municion, rreth 200 gëzhoja dhe 1 armë të ftohtë (thikë).
Sakaq, Bledar Kristo 49 vjeç, rezulton me recedent të mëparshëm kriminal po për të njëjtën vepër penale, atë të armëmbajtjes pa leje.
“Vlorë/Finalizohet me sukses nga Komisariati i Policisë Vlorë, operacioni policor i koduar “Duo”, goditet një rast armëmbajtjeje pa leje.
Arrestohen në flagrancë babë e bir që posedonin armë zjarri dhe municion në banesë.
Sekuestrohen 1 armë zjarri automatike me fishek në fole gati për qitje, rreth 200 gëzhoja municioni dhe 1 armë e ftohtë.
Në kuadër të punës së pandërprerë për evidentimin dhe goditjen e rasteve të armëmbajtjes pa leje, si dhe për të parandaluar ngjarje të rënda kriminale që mund të ndodhnin nga përdorimi i tyre, shërbimet e Komisariatit të Policisë Vlorë, bazuar në informacionet e siguruara nga inteligjenca informative, organizuan dhe finalizuan me sukses operacionin policor të koduar “Duo”.
Si rezultat i këtij operacioni, u arrestuan në flagrancë shtetasit:
•B. K., 49 vjeç, me precedent penal të mëparshëm për armëmbajtje pa leje;
* K. K., 21 vjeç, djali i tij, banues të dy në fshatin Mifol.
Gjatë kontrollit të ushtruar në banesën e tyre, në fshatin Mifol, shërbimet e Policisë gjetën dhe sekuestruan në cilësinë e provës materiale 1 armë zjarri automatike me fishek në fole gati për qitje, 1 krehër me municion, rreth 200 gëzhoja dhe 1 armë të ftohtë (thikë).
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme”, njofton policia.
Komente
