VLORË - Policia ka zbardhur ngjarjen e djeshme të ndodhur në lagjen Pavarësia, Vlorë, ku gjatë një konflikti mes disa të rinjve, 2 prej tyre përfunduan në spital të plagosur me thikë.
Pas këqyrjes së kamerave të sigurisë nga vendi i ngjarjes, të siguruara edhe nga Report Tv, blutë arrestuan Indrit Halili, 32-vjeç, autorin e plagosjes me thikë të Kristi Konstadini dhe një 39-vjeçari, të cilët fatmirësisht janë jashtë rrezikut për jetën. Thika u sekuestrua si provë materiale.
Njoftimi i policisë:
Në vijim të informacionit paraprak të dhënë mbrëmjen e djeshme, u bë i mundur dokumentimi i plotë, bazuar edhe në pamjet filmike të siguruara nga vendi i ngjarjes, i konfliktit të ndodhur në Vlorë. Specialistët për Hetimin e Krimeve në Komisariatin e Policisë Vlorë arrestuan në flagrancë shtetasin I. H., 32 vjeç, banues në Vlorë, për veprën penale “Plagosje e rëndë me dashje”.
Ky shtetas, për motive të dobëta, është konfliktuar fizikisht, në lagjen “10 Korriku” dhe në lagjen “Pavarësia 2”, me dy shtetas të ndryshëm, të cilët gjatë konfliktit i ka dëmtuar me mjet prerës (thikë). Shtetasit e dëmtuar, M. F., 39 vjeç dhe K. K., 32 vjeç, kanë marrë ndihmën mjekësore dhe ndodhen jashtë rrezikut për jetën. Gjithashtu, edhe shtetasi i arrestuar I. H. ka marrë ndihmën mjekësore për dëmtimet e marra gjatë konfliktit.
Në cilësinë e provës materiale u bë sekuestrimi i mjetit prerës (thikë) i përdorur nga shtetasi I. H.
Materialet iu referuan Prokurorisë, për veprime të mëtejshme.
Komente
