Report Tv ka zbardhur identitetin e klientit italian, i cili pagoi me 8 mijë euro avokatin e tij Besart Logu, me qëllim që ky i fundit të ndikonte të drejtësia për ta liruar nga burgu.
Klienti i avokatit Logu është italiani Salvatore Castorina. Ky i fundit i arrestuar në mars 2024 si pjesë e një grupi me shqiptarë dhe italianë të cilët bashkëpunonin në Gjirokastër dhe regjistronin subjekte e lëshonin TVSH fiktive për shërbime konsulence, duke krijuar teprica kreditore për të përfituar më pas rimbursim të TVSH-së. Gjatë këtij operacioni u sekuestruan 3 llogari bankare me vlerë 1.3 milionë euro dhe 13 milionë lekë.
Salvatore Castorina alias Andrea Di Dio alias Salvatore Cascino, u arrestua në Itali në mars të 2024 dhe në korrik 2024 u ekstradua në Shqipëri ku u njoh dhe me masën e arrestit në burg dhënë në mungesë nga gjykata.
Salvatore Castorina akuzohet për “Krijimi i skemave mashtruese lidhur me tatimin mbi vlerën e shtuar”, kryer në bashkëpunim“Fshehja e te ardhurave” dhe “Falsifikimi i vulave, stampave ose i formularëve”, kryer në bashkëpunim.
Si nisi hetimi ndaj avokatit Logu?
Më 27 nëntor 2024, SPAK regjistroi procedimin penal ndaj Besart Logut për veprat penale korrupsion pasiv i gjyqtarëve e prokurorëve dhe ushtrim i ndikimit të paligjshëm.
Regjistrimi i procedimit u bë në bazë të kallëzimit të vetë klientit të tij, shtetasit italian Salvatore Cascino.
Avokati Logu i kishte kërkuar 8 mijë euro klientit për të ndikuar te prokurori e gjyqtari i çështjes në Gjykatën e Tiranës për ta liruar nga burgu.
Prokuroria e Posaçme thotë se e ka të dokumentuar me përgjime dhe filmime marrjen e parave nga avokati Logu, episod i ndodhur më 13 dhjetor 2024.
Që prej dhjetorit 2024 e deri më tani, ka rezultuar se avokati i ka mbajtur për vete paratë dhe nuk kanë prova që t'ua ketë dhënë funksionarëve të drejtësisë. Megjithatë hetimet vijojnë ende për dokumentimin e plotë të rastit.
Lajmi kryesor:
I mori 8 mijë euro klientit, ‘arrest shtëpie’ për avokatin Besart Logu! SPAK: I premtoi klientit se do paguante prokurorë e gjyqtarë për ta nxjerrë nga burgu!
V.GJ /ReportTv.al
