TIRANE- Kur kanë mbetur dhe dy ditë nga afati i regjistrimit të partive, në KQZ 26 parti kanë dorëzuar kërkesën për tu regjistruar në garën elektorale të 11 majit.
Krahas 3 partive të mëdha, PD, PS dhe Partisë së Lirisë, janë regjistruar dhe 23 parti të tjera të vogla, mes të cilave aleatët me të cilët Partia Demokratike do të dalë në koalicion si dhe partitë e reja që në këto zgjedhje do të provojnë veten me ambicien për përfaqësim në parlament, si ‘Mundësia’ e Agron Shehajt, ‘Lëvizja Bëhet’ apo ‘Bashkë’ e Arlind Qorrit.
Ndërkohë në zgjedhje ende nuk është regjistruar partia e Lulzim Bashës, Koalicioni Euroatlantik, apo ajo e Enkelejd Alibeajt ’Djathtas 1912’. Partitë kanë kohë deri më 25 shkurt për t’u regjistruar për zgjedhjet e 11 majit ndërkohë që më 7 mars është afati për regjistrimin e koalicioneve ndërsa 12 mars dorëzohen kandidatët.
Në zgjedhjet e 11 majit do të votojë për herë të parë dhe diaspora. Deri tani janë mbi 210 mijë shqiptarë nga diaspora që kanë aplikuar për t’u regjistruar në zgjedhje, ndërsa janë miratuar rreth 170 mijë kërkesa.
Ndërkohë Komisioni Qendror i Zgjedhjeve ka përgatitur tre skenarë se ku mund të zhvillohet votim dhe numërim elektronik në zgjedhjet e 11 majit. Variantet u janë dërguar për konsultim partive politike dhe Komisionit Rregullator, i cili në fund fare do të vendosë se ku do të eksperimentohet ky proces.Në të tre propozimet e përgatitura nga Ilirjan Celibashi, votimi e numërimi elektronik ndahet mes bashkive: Tiranë, Vorë dhe Durrës.
Report TV ka siguruar modelin e fletës së votimit me të cilën do të votojmë në 11 maj. Fleta do të ketë të gjithë kandidatët me emra, si listën e mbyllur ashtu edhe listën e hapur. Fleta e qarkut Tiranë do të ketë përmasa gjigande për shkak se prodhon 37 deputetë dhe duhet të ketë 49 emra për çdo subjekt zgjedhor.
Numri i emigrantëve që regjistrohen për t’u bërë për herë të parë pjesë e zgjedhjeve parlamentare të 11 majit, vijon të rritet me ritme të shpejta.
Janë mbi 210 mijë shqiptarë nga diaspora që kanë aplikuar për t’u regjistruar në zgjedhje, ndërsa janë miratuar rreth 170 mijë kërkesa.
Afro 39 mijë të tjera janë refuzuar për shkak të adresës, ndërsa përfaqësues të KQZ e kanë quajtur shifrën e regjistrimit më të lartë se parashikimet fillestare.
Ndërkohë regjistrimet pritet të rriten, pasi emigrantët kanë edhe 8 ditë kohë për të aplikuar.
Komente
