Në Himarë ka nisur sot zyrtarisht fushata elektorale për kreun e bashkisë. Fushata elektorale do të zgjasë vetëm një javë, duke u bërë kështu një nga fushatat më të shkurtra të zhvilluara ndonjëherë në vendin tonë.
Ajo do të zgjasë deri në datën 2 gusht, në data 3 do të jetë heshtje zgjedhore, ndërsa në datën 4 do të votohet.
Partia Socialiste garon për kreun e bashkisë së Himarës me Vangjel Tavon, ndërsa Partia Demokratike e cila është në koalicion me disa parti të tjera, garon me Petro Gjikurinë.
Këto zgjedhje mbahen vetëm për kryetarin e bashkisë, pas dënimit të Fredi Belerit me dy vite burg për blerje votash.
Vangjel Tavo, kandidati i Partisë Socialiste do renditet i pari në fletën e votimit, ndërsa kandidati i propozuar nga koalicioni Bashkë Fitojmë, Petro Gjikuria do të jetë i renditur i dyti.
Në bashkinë Himarë janë të regjistruar rreth 22 mijë zgjedhës, por në zgjedhjet e fundit lokale kanë votuar vetëm 7 mijë zgjedhës.
M.Q.//ReportTv.al