Agjencia Kombëtare e Mbrojtjes Civile njoftoi se dy prej vatrave aktive të zjarrit janë regjistruar në Tiranë, një në Miras të Devollit dhe një në Krujë. Lokalizohet zjarri në zonën e Akërnisë në Vlorë, mbahet nën monitorim. U shuan 21 vatra zjarri në total
Situata e zjarreve në vend në krahasim me dy ditë më parë ka pasur një intensitet më të lartë vatrash, por edhe efektivitet në shuarjen e tyre.
Gjatë 24 orëve të fundit janë evidentuar gjithsej 26 vatra zjarri, prej të cilave 21 vatra janë shuar, 4 vatra vijojnë aktive dhe 1 vatër është në monitorim.
Sipas Agjencisë Kombëtare të Mbrojtjes Civile, janë ende aktive vatrat në fshatin Pezë-Helmës të Tiranës me disa zona, në fshatin Fage po bashkia Tiranë, në fshatin Miras të bashkisë Devoll dhe në lagjen Bojë, bashkia Krujë, ku dy vatra po përfshijnë sipërfaqe pyjore me pisha në zonë të mbrojtur.
Ndërkohë, vatra e zjarrit në fshatin Delisuf, bashkia Vlorë, zona e Poros, është nën monitorim, ndërsa situata është e qetë dhe pa prani tymi.
Njoftimi i plotë i Agjencisë Kombëtare të Mbrojtjes Civile:
“Sipas të dhënave të Qendrës Kombëtare Operacionale të Emergjencave Civile (QKOEC) në AKMC, gjatë 24 orëve të fundit janë evidentuar gjithsej 26 vatra zjarri, prej të cilave:
-21 vatra janë shuar
-4 vatra vijojnë aktive
-1 vatër është në monitorim
Vatra të izoluara dhe të shuara
Është bërë izolimi i plotë dhe shuarja e zjarreve në:
Havalehas (Kuçovë), Krutje (Lushnjë), Rubjek (Shijak), Lagjja nr.10 (Korçë), Drobonik (Berat), Kotë (Selenicë), Kameras (Durrës), Martalloz (Memaliaj), Stadiumi dhe puset e naftës (Kuçovë), Fushë Milot (Kurbin), “Gjëmbi” (Selenicë), Lanabreges (Tiranë), Bogovë (Skrapar), Durisht (Tiranë), Barbullush (Vau Dejës), Bogiç-Palvar (Malësi e Madhe), Katundi i Ri (Durrës), Mjull Bathore (Tiranë), Hamallaj (Durrës), Parku Natyror Gërmenj (Kolonjë), si dhe midis fshatrave Nivicë, Salari e Dhëmblan (Tepelenë).
Vatra aktive
Aktualisht vijojnë të jenë aktive 4 vatra zjarri:
-Në fshatin Pezë Helmës, bashkia Tiranë, ku janë të pranishme disa vatra të izoluara që po mbahen në monitorim nga zjarrfikësit.
-Në fshatin Fage, bashkia Tiranë, ku zjarri është aktiv dhe në monitorim nga zjarrfikësit, forcat bashkiake dhe vullnetarët.
-Në fshatin Miras, bashkia Devoll, ku ka prani tymi në disa zona dhe rreth 100 forca janë angazhuar për shuarjen e flakëve.
-Në lagjen Boje, bashkia Krujë, ku dy vatra po përfshijnë sipërfaqe pyjore me pisha në zonë të mbrojtur.
Ndërkohë, vatra e zjarrit në fshatin Delisuf, bashkia Vlorë, është nën monitorim, ndërsa situata është e qetë dhe pa prani tymi.
Strukturat e Mbrojtjes Civile dhe Forcat e Armatosura vijojnë punën në terren në bashkëpunim me autoritetet vendore".
Një vatër zjarri është regjistruar përsëri në Krastë të Krujës, në vendin e quajtur Bojë, në afërsi të guroreve.
Zjarri ka përfshirë një sipërfaqe me pisha e shkozë dhe po djeg hektarë të tërë.
Për shkak të terrenit është e pamundur ndërhyrja me mjete dhe për këtë është kërkuar ndërhyrja e helikopterit, i cili pak më parë është angazhuar për shuarjen e flakëve.
Gazetari i Report Tv, Julian Shota, që ka siguruar edhe pamjet e zjarrit dhe aksionit me helikopter, informon se sipas burimeve, zjarri është i qëllimshëm, pasi janë 4 vatra të ndryshme.
Sipas po të njëjtit burim, dyshohet që të gjithë zjarret e kohëve të fundit në Krastën e Krujës janë të qëllimshëm dhe dyshohet se shkaktohen nga guroret, të cilat duan të hapin territore për zgjerimin e zonës që shfrytëzojnë.
Zjarri në Miras të Korçës
Devoll- Teksa vatra e zjarrit në Miras të Devollit vijon të jetë aktive dhe tashmë është lokalizuar për të mos u përhapur, Policia ka marrë nën akuzë një 50-vjeçar për shkaktimin e një prej vatrave në këtë zonë, nga pakujdesia.
Shërbimet e Komisariatit njoftuan se referuan materialet në Prokurori, ku filloi procedimi penal për E. S., 50 vjeç, banues në fshatin Miras.
“Dyshohet se nga pakujdesia ka ndezur zjarr dhe nga përhapja e flakëve është djegur një sipërfaqe toke”, tha policia.
Por nuk është mbyllur me kaq ky procedim, sepse gjatë kontrollit në banesën e tij, u gjetën dhe u sekuestruan 4 m³ lëndë drusore e dyshuar e prerë në mënyrë të paligjshme, për të cilat gjithashtu nisi hetimi.
Devoll- Situata e zjarrit në kurorën e pyllit në fshatin Miras, Njësia Administrative Miras në Bashkinë Devoll, paraqitet e qetë dhe pa intensitet ditën e sotme.
Ulja e ndjeshme e temperaturave gjatë natës ndihmoi edhe në rënien e intensitetit të flakëve.
Prej orës 05:00 të mëngjesit, në terren ndodhen rreth 100 forca nga të gjitha shërbimet e bashkisë, ndërsa aksionin po e ndjek nga afër nënprefekti i Devollit.
Aktualisht po punohet për krijimin e kanaleve izoluese dhe monitorimin e zonës, me qëllim shuarjen e vatrave që mund të mbeten ende aktive.
Komente
