Champions League mbylli të mërkurën ditën e gjashtë në ndeshjet e fazës së ligës, aty ku nuk munguan surprizat. Pas këtyre ndeshjeve zyrtarisht më tej janë Liverpool dhe Barcelona, ndërsa të eliminuara me zero pikë janë Leipzig, Young Boys dhe Slovan Bratislava.
Në Torino, Juventusi fitoi 2-0 kundër Manchester Cityt dhe konfirmoi krizën e djemve të Pep Guardiolës. Vlahovic dhe McKennie në pjesën e dytë vendosën ndeshjen dhe bëjnë që ‘Zonja’ në dy ndeshjet e radhës të jetë në garë për vendin e tetë që të kalon direkt në 1/8. Nga ana tjetër Manchester City me tetë pikë ka thuajse zero shanse që të kalojë direkt me dy ndeshjet e mbetura.
Në ‘Iduna Park’ tifozët panë spektakël të vërtetë futbollit, me vendasit e Dortmund që paçka një loje të mirë u mposhtën 2-3 nga Barcelona. Golat e Raphinhas dhe dopieta e Ferran Torres bënë që katalanasit të kalojnë më tej. Ndërkohë dopieta e Guirassy vetëm sa barazoi dy herë rezultatin momental për vendasit.
Në ‘Emirates’ Arsenal nuk e kurseu Monacon dhe fitoi 3-0. Saka me dygolësh dhe Havertz ishin autorët e golave, ndërsa ‘Topçinjtë’ mbajnë vendin e tretë dhe janë me një këmbë në 1/8.
Në ‘San Siro’ Milani mposhti 2-1 Crvena zvezdën, jo aq lehtë sa ishte parashikuar në letër. Leao dhe Abraham shënuan për vendasit, ndërsa momentalisht për serbët barazoi Radonjic.
Tri pikë edhe për Atl. Madrid, Lille, Feyenoord dhe Stuttgart. Ndërkohë te Sparta e Pragës që humbi 4-2 me Feyenoord, një nga golat e shënoi sulmuesi i Kosovës Albion Rrahmani. 22 minuta në pjesën e dytë luajti Qazim Laçi, ndërsa 13' Ermal Krasniqi për çekët.
Tetë vendet e para që për momentin janë në 1/8 edhe pse ende duhen dy ndeshje për t’u luajtur janë: Liverpool, Barcelona, Arsenal, Leverkusen, Aston Villa, Inter, Brest dhe Lille.
Champions League, raundi 6-të:
E mërkurë, 11 dhjetor 2024
18:45
Atletico Madrid 3-1 Slovan Bratislava
Lille 3-2 Sturm Graz
21:00
Milan 2-1 Crvena zvezda
Arsenal 3-0 Monaco
Benfica 0-0 Bologna
Dortmund 2-3 Barcelona
Feyenoord 4-2 Sparta Prague
Juventus 2-0 Manchester City
Stuttgart 5-1 Young Boys
Renditja:
Një fitore në dhjetë ndeshjet e fundit, këto janë statistikat e Pep Guardiolës dhe Manchester Cityt të tij. Të mërkurën "Qytetarët" u mposhtën 2-0 nga Juventusi në Champions League, teksa shohin vendin e 22-të në klasifikim.
Pas ndeshjes për mediet trajneri spanjoll tha se është në diskutim për stolin, ndërsa po punon për të zgjidhur këtë situatë.
“Këtë herë nuk bëmë gabime. Ishim shumë pranë portës kundërshtare, por na mungoi vetëm goli. Jam krenar për lojtarët e mi. Është e qartë se është diçka e vështirë kur ti qëndron gjatë gjithë kohës përpara portës dhe provon të fitosh, por nuk vjen rezultati.
Dua t’i jap meritat që ka edhe Juventusi në këtë ndeshje. Megjithatë, paraqitja jonë ishte pozitive. Vlahoviç u tregua i zoti që shënoi atë gol.
A është Guardiola në diskutim? Po, sigurisht. Është e qartë që është edhe faji im për këtë situatë. Sigurisht që do të vendosem dhe unë në diskutim, edhe pse po luftoj shumë për të dalë nga kjo situatë”, tha Guardiola.
Shtatë humbje, dy barazime dhe vetëm një fitore për Cityn në dhjetë ndeshjet e fundit kanë bërë që skuadra të jetë shumë larg paraqitjeve të sezoneve të shkuara.
Ndeshje e veçantë në Champions League. Atletico Madrid fitoi 3-1 ndaj Slovan Bratislavës, ndërsa në stol dy baballarët trajnera futën në fushë djemtë e tyre.
21-vjeçari Giuliano Simeone, djali i trajnerit Diego, ka luajtur nga minuta e parë për Atletico Madridin. Për miqtë luajti Vladimir Weiss Jr, djali i trajnerit me të njëjtin emër të Slovan Bratislavës.
Juventusi ia doli të mposhtte 2-0 Manchester Cityn në xhiron e gjashtë të ndeshjeve të ligës në Champions League. Bardhezinjtë siguruan tri pikë të vlefshme për t'u afruar me zonën që të dërgon direkt në 1/8, ndërsa Man. City në dhjetë ndeshjet e fundit ka vetëm një fitore dhe po kalon një krizë reale.
Pas ndeshjes për mediet foli Thiago Motta, trajneri i Juventusit. Ai tha se bëjnë punën e trajnerit për emocione të tilla.
"Tani vjen pjesa më e bukur. Një fitore e merituar. Luajtëm me shumë shpirt, por gjithashtu me edhe me mendje dhe me dëshirën për t’i bërë gjërat mirë dhe në mënyrën e duhur. McKennie mund të bëjë gjithçka. Ne e bëjmë këtë punë për të përjetuar emocione si ato që përjetuam sot", tha Motta.
