Vijon prej më shumë se 14 orësh operacioni për shuarjen e zjarrit që ka përfshirë një sipërfaqe pyjore me pisha dhe lisa në fshatin Shkopet, të Kurbinit. Flakët u shfaqën mbrëmjen e së shtunës në një Zonë të Mbrojtur Natyrore, duke shkaktuar rrezik për përhapje të mëtejshme, ndërsa është punuar deri në orët e vona të mbrëmjes për vënien nën kontroll të zjarrit.
Ndërkohë që prej orës 06:00 të mëngjesit të së dielës, forcat tokësore kanë intensifikuar punën për izolimin dhe shuarjen e vatrave aktive, duke ndërhyrë në mënyrë të përqendruar në të dy krahët e vatrës së zjarrit dhe duke hapur korridore mbrojtëse mes zonës së prekur dhe asaj të paprekur. Për shkak të afërsisë me banesat dhe bizneset pranë rrugës nacionale Milot–Burrel, mjetet zjarrfikëse janë pozicionuar në këtë aks për të mbrojtur objektet e rrezikuara.
Në operacion janë angazhuar:
Rreth 50 forca bashkiake të Bashkisë Kurbin, të drejtuara nga nënkryetari;
30 trupa të Forcave të Armatosura dhe 2 efektivë të Policisë Ushtarake, me 4 mjete dhe 1 mjet shoqërimi;
3 mjete zjarrfikëse (nga Kurbin, Mat dhe një autobot nga Mirdita);
3 përfaqësues të AdZM;
Struktura të Drejtorisë Rajonale Veriore të AKMC dhe Institucioni i Prefektit të Qarkut Lezhë.
Përpjekjet në terren po përqendrohen në krehjen e plotë të zonës së djegur dhe në eliminimin e trungjeve dhe kërcunjve ende të ndezur, për të shmangur rindezjen e vatrave.
Lajmi kryesor:
Vijon zjarri në Dukat, rrezikoi Parkun e Llogarasë, mbyllet operacioni për shuarjen e vatrave, në ndihmë erdhi helikopteri i ushtrisë, 50 efektivë punuan në terren
K.M/I.M/ReportTv.al
