ANGLI - Manchester United arriti të regjistrojë fitoren e parë këtë sezon në Premier League, duke mundur Burnleyn me rezultat të ngushtë 3-2 në ‘Old Trafford’, në kuadër të raundit të tretë.
Ndeshja nisi me tension të lartë dhe në minutën e 17-të ‘Djajtë e Kuq’ kërkuan penallti pas një ndërhyrjeje të Kyle Walker ndaj Mount, por vendimi i gjyqtarit u anulua pas rishikimit në VAR.
Unitedi kaloi në epërsi në minutën e 27-të, kur Josh Cullen shënoi aksidentalisht një autogol. Mason Mount pati një mundësi të artë në minutën e 40-të, por goditja e tij me kokë u ndal nga traversa, ndërsa Amad Diallo u ndal nga portieri mik vetëm pak para fundit të pjesës së parë.
Pjesa e dytë solli barazimin e Burnleyt në minutën e 56-të me Lyle Foster, por Bryan Mbuemo riktheu epërsinë për Manchester United vetëm një minutë më vonë, pas asistit të Diogo Dalot, duke vendosur shifrat 2-1. Burnley nuk u dorëzua dhe barazoi sërish në minutën e 66-të me Jaidon Anthony.
Kur dukej se ndeshja do të mbyllej me barazim, Bruno Fernandes realizoi nga pika e bardhë në minutën e 90+4, duke i dhënë fitoren dramatike vendasve. Ky triumf i shënon fundin e një fillimi të vështirë për Manchester United, pas humbjes ndaj Arsenalit dhe barazimit me Fulhamin në dy raundet e para të Premier League.
Sa i takon Burnleyt, trajneri Scott Parker vendosi mos e grumbullonte Armando Brojën për ndeshjen e tretë radhazi, duke e lënë në shtëpi.
Në ndeshjet e tjera, Chelsea mposhti Fulhamin 2-0, Sunderland fitoi 2-1 kundër Brentord, me golin e dytë për vendasit që u asistua nga Granit Xhaka në shtesë. Everton fitoi 2-3 në fushën e Wolves, ndërsa surpriza e Londrës ishte humbja 0-1 e Tottenhamit kundër Bournemouth.
Komente
