TIRANË - Nisja e procedurave për shkarkimin e tij e ka vënë kryebashkiakun Erion Veliaj në një kurs përplasjeje me Këshillin Bashkiak. Kërkesa për të qenë i pranishëm në mbledhjen e nesërme, ka marrë një përgjigje të thatë nga Sekretari i Këshillit, sipas të cilit nëse do ta ketë të pamundur praninë fizike, ai mund të dërgonte argumentet me shkrim. I menjëhershëm reagimi i Veliajt. Ai thotë se nuk është vënë zyrtarisht në dijeni për procedurat e shkarkimit, dhe as i është garantuar e drejta për t’u dëgjuar. Kryebashkiaku kërkon që Këshilli të shprehet me votë për praninë e tij në sallë.
***
Deri para se ta arrestohej në shkurt të këtij viti, Këshilli Bashkiak kishte qenë streha ku Erion Veliaj kishte marrë gjithnjë përkrahjen e pakursyer për projektet e tij për Tiranën.
Madje në sallë nuk kishin munguar edhe skenat e përplasjes fizike të këshilltarëve socialistë me përfaqësuesit e opozitës, në mbrojtje të Veliajt.
Sot ky i fundit, e sheh veten në një situatë të përmbysur. Opozita, për llogaritë e saj politike, mbështet kërkesën e tij për të qenë i pranishëm në mbledhjen e Këshillit ku do të propozohet shkarkimi i tij.
Ndërsa, socialistët bëjnë sikur nuk e kuptojnë kërkesën. Përmes Sekretarit të Këshillit, Behar Zeneli, përgjigja ishte e thatë.
“Në rast pamundësie për të qenë prezent, Ju lutemi që observacionet tuaja, t’i përcillni me shkrim pranë Këshillit Bashkiak, në mënyrë që ato të administrohen dhe të bëhen me dije në këtë mbledhje”.
Në fakt, lëvizja e Veliajt, përmes kërkesës së bërë të premten e kaluar, dukej se kishte për qëllim të vinte në lëvizje Këshillin, që të ishte ky institucion që të kërkonte zyrtarisht praninë e tij në mbledhje.
Kjo, mesa duket shpjegon dhe faktin se përse ai nuk i është drejtuar personalisht Drejtorisë së Burgjeve, për të kërkuar leje që të shkojë në Këshill.
Por përgjigjia përmes Sekretarit Zeneli, e anashkalonte thelbin e kërkesës.
Reagimi i Veliajt dhe mbrojtësve të tij, nuk vonoi. Ai i kujtonte Sekretarit të Këshillit se nuk mund të merrte përsipër rolin e një organi kolegjial, për më tepër kur kompetencat e tij janë më së shumti të natyrës administrative.
Veliaj i kujton Këshillit se ai nuk ka asnjë njoftim zyrtar për zhvillimin e mbledhjes, shkaqet e shkarkimit apo materialet që e ngarkojnë me përgjegjësi.
“Kërkimi i sqarimeve dhe provave nga ana ime lidhur me shkeljen e pretenduar dhe materialet mbi të cilat ajo mbështetet, dhe si rrjedhojë nuk më është krijuar mundësia për t'u mbrojtur, dhënë shpjegime e dëgjuar para këtij organi kolegjial, as fizikisht e as me shkrim, për më tepër kur, duke qenë se ndodhem në kushtet e paraburgimit, bazuar në një masë sigurimi personale, mundësitë i kam të kufizuara”.
Veliaj këmbëngul se se duhet të jetë vetë Këshilli që duhet të shprehet për kërkesën e tij.
“Mbetem në pritje të vendimmarrjes me votim nga ana e Këshillit Bashkiak, për garantimin e të drejtave kushtetuese të Kryetarit të Bashkisë në procesin e iniciuar për shkarkimin e tij”.
Ndërkohë, komisioni i Ligjeve në Bashkinë e Tiranës do të mblidhet nesër për të shqyrtuar kërkesën e këshilltarëve socialistë për shkarkimin e kryebashkiakut Erion Veliaj. Shqiptarja.com mëson se mbledhja, e cila pritej të mbahej sot, është shtyrë për nesër në orën 10:00, ndërsa pritet që të futet në rend dite kërkesa për shkarkimin e Veliajt. Më pas, në 16:00 do të mblidhet Këshilli Bashkiak, ku pritet të diskutohet edhe për kërkesën për shkarkimin e Veliajt.
Këshilltarët socialistë në Bashkinë e Tiranës u vunë në lëvizje duke nisur procedurën për shkarkimin e Veliajt pas kërkesës së Edi Ramës në Asamblenë e PS, duke u mbështetur në shkeljen e nenit 62, gërma C, të Ligjit 139/2015 "Për Vetëqeverisjen Vendore", që ka të bëjë me mosparaqitjen në detyrë për të paktën 3 muaj.
Vendimmarrja për t’i propozuar qeverisë shkarkimin e kryebashkiakut do të duhet të marrë votën e shumicës së të gjithë këshilltarëve, pra 31 pro nga 61 anëtarë gjithsej. Pas votimit, vendimmarrja i kalon Këshillit të Ministrave përmes Prefektit të Tiranës. Qeveria më pas vendos shkarkimin.
Por, vendimi i qeverisë për shkarkimin e kryebashkiakut mund të mos jetë fjala e fundit. Neni 115 i Kushtetutës e thotë qartë se Kryetari i bashkisë ka të drejtë ta ankimojë shkarkimin në Gjykatën Kushtetuese brenda 15 ditësh, dhe në këtë rast vendimi i qeverisë do të pezullohej, deri në një vendimmarrje të gjykatës më të lartë në vend.
Vetë Veliaj përmes letrës drejtuar Këshillit Bashkiak e lë të hapur ankimin në Gjykatë Kushtetuese të vendimit të mundshëm për shkarkim. Ai fliste për një akt të pajustifikuar që krijon precedent të rrezikshëm për demokracinë, si edhe theksonte se do ta mbrojë deri në fund kontratën e tij 4-vjeçare me qytetarët e Tiranës.
Erion Veliaj qëndron në paraburgim me masë sigurie “arrest në burg” që prej 10 shkurtit 2025, kur u arrestua me urdhër të GJKKO pasi akuzohet nga SPAK për 13 akuza, mes të cilave 9 raste korrupsioni.
Letra e Këshillit Bashkiak drejtuar Erion Veliajt
Dorjan Teliti
Partia Demokratike thekson qëndrimin e saj për procesin e shkarkimit të kryebashkiakut Erion Veliaj, duke përsëritur se ky i fundit duhet të jetë i pranishëm në mbledhjen e nesërme të Këshillit Bashkiak dhe t'i dëgjohen pretendimet, para ky organ të propozojë shkarkimin e tij.
Reagim i Dorjan Telitit, Nënkryetar i Këshillit Bashkiak Tiranë:
Kryesia e Këshillit Bashkiak duhet të mblidhet URGJENTISHT SOT për të garantuar që procedura e shkarkimit të Erion Veliajt të zhvillohet në përputhje me ligjin (duke filluar nga e dëgjesa e tij në mbledhjen e Këshillit).
Çdo shkelje/devijim nga rregullat ligjore do të rëndojë nesër mbi qytetarët e Tiranës me faturë dëmshpërblimi prej qindra mijëra eurosh si pasojë e shkeljeve proceduriale.
Shkarkimi i Veliaj duhet të ndodhë sa më shpejt, por gjithmonë duke respektuar procedurën ligjore.
Më herët gjatë ditës së sotme Veliaj iu përgjigj kërkesës së Sekretarit të Këshillit Bashkiak të Tiranës, ku thuhej që kryebashkiaku të dërgonte me shkrim mbrojtjen e tij në rast pamundësie për të qenë i pranishëm në mbledhje.
Në përgjigje, Veliaj theksoi se nuk është kompetencë e Sekretarit të Këshillit Bashkiak të bëjë kufizime të tilla.
Edhe kreu i Partisë Demokratike, Sali Berisha, është shprehur se kryebashkiaku Veliaj duhet të dëgjohet nesër në mbledhjen e Këshillit Bashkiak të Tiranës para se anëtarët të propozojnë shkarkimin e tij, duke u bazuar në nenin 62, gërma c, të ligjit për qeverisjen vendore, i cili thotë se organit legjislativ të bashkisë i lind e drejta për të kërkuar shkarkimin e kryetarit, në rast se ky i fundit ka munguar në krye të detyrës për më shumë se 3 muaj.
Kryebashkiaku i Tiranës, Erion Veliaj i është përgjigjur sekretarit të Këshillit Bashkiak, pasi letrës që i shkoi në qeli që të dërgojë me shkrim pretendimet e tij, në rast se nuk paraqitet dot në mbledhjen e Këshillit për shkarkimin e tij. Veliaj thotë në letër se ende nuk është njoftuar për rendin e ditës së mbledhjes, por për faktin që do diskutohet për shkarkimin e tij është njohur vetëm në media. Veliaj thotë se nuk ka pasur kohë për të përgatitur mbrojtjen, as fizikisht, as me shkrim.
“Në përgjigje të shkresës nr. 32059/2 prot, datë 22.09.2025, me firmën e sekretarit të Këshillit Bashkiak, evidentojmë se nuk përmban vendimmarrjen me votim të Këshillit Bashkiak lidhur me garantimin e të drejtave kushtetuese të Kryetarit të Bashkisë në procedurën e shkarkimit të iniciuar ndaj tij, si organi që ka kompetencën për të vendosur mbi praninë, dëgjimin dhe mbrojtjen e Kryetarit të Bashkisë.
Sekretari i Këshillit Bashkiak nuk mund të marrë përsipër rolin e një organi kolegjial. Çdo komunikim i Sekretarit të Këshillit që shkon përtej funksioneve tekniko-administrative përbën tejkalim të kompetencës dhe cenim të parimit të ndarjes së funksioneve. Sekretari është një funksionar administrativ, jo organ politik dhe as vendimmarrës në këtë procedurë. Kompetencat e tij kufizohen në sigurimin e infrastrukturës organizative të mbledhjeve; shpërndarjen e materialeve dhe njoftimeve; protokollimin dhe mbajtjen e procesverbaleve. Ai nuk ka asnjë tagër ligjor të japë udhëzime mbi mënyrën e realizimit të së drejtës për t'u dëgjuar apo për të interpretuar kërkesat e Kryetarit. Në një procedurë që mund të përfundojë me shkarkimin e Kryetarit, e drejta për t'u dëgjuar dhe mbrojtur e Kryetarit të Bashkisë. si një organ kushtetues është thelbësore. Kjo e drejtë nuk mund të reduktohet në një njoftim formal të sekretarit të Këshillit Bashkiak lidhur me mundësinë potenciale për të sjellë një mbrojtje me shkrim.
Pavarësisht sa më sipër, nga përmbajtja e shkresës së dërguar nga ana e sekretarit të Këshillit Bashkiak, unë kryetari bashkisë vetëm informohem se Këshilli Bashkiak, ditën e nesërme, në orën 16%, ka një mbledhje, pa u informuar zyrtarisht se për çfarë do të zhvillohet kjo mbledhje dhe cili është rendi i ditës së saj, si dhe nuk kam asnjë informacion zyrtar (përveç lajmit mediatik) lidhur me garantimin e së drejtës për t'u dëgjuar në këtë mbledhje, e cila edhe pa një kërkesë nga ana ime do të duhet të më ishte mundësuar kryesisht nga ana juaj.
Ende sot, një ditë përpara vendimmarrjes së Këshillit Bashkiak, nuk jam informuar zyrtarisht nga ky këshill lidhur me mbajtjen e një mbledhjeje në të cilën do të vendoset lidhur me shkarkimin tim si Kryetar Bashkie, shkaqet e shkarkimit, materialet që më ngarkojnë me përgjegjësi, sqarimet përkatëse nga ana juaj. kërkimin e sqarimeve dhe provave nga ana ime lidhur me shkeljen e pretenduar dhe materialet mbi të cilat ajo mbështetet, dhe si rrjedhojë nuk më është krijuar mundësia për t'u mbrojtur, dhënë shpjegime e dëgjuar para këtij organi kolegjial, as fizikisht e as me shkrim, për më tepër kur, duke qenë se ndodhem në kushtet e paraburgimit, bazuar në një masë sigurimi personale, mundësitë i kam të kufizuara.
Për sa më sipër, mbetem në pritje të vendimarrjes me votim nga ana e Këshillit Bashkiak, për garantimin e të drejtave kushtetuese të Kryetarit të Bashkisë në procesin e iniciuar për shkarkimin e tij”, shkruan Veliaj në letër.
Më poshtë mund të lexoni edhe reagimin e mbrojtjes së Veliajt për mbledhjen e Këshillit Bashkiak
“Në datën 22 shtator 2025, Sekretari i Këshillit Bashkiak të Tiranës ka bërë publik një njoftim (nuk ka një njoftim zyrtarë) mbi thirrjen e një mbledhjeje të Këshillit Bashkiak, të planifikuar për datën 23 shtator, ora 16:00.
Ky njoftim nuk përmban asnjë vendimmarrje të vetë Këshillit Bashkiak lidhur me garantimin e të drejtës kushtetuese të Kryetarit të Bashkisë për t’u dëgjuar, mbrojtur dhe shprehur qëndrimin e tij, siç parashikohet në çdo proces serioz e të drejtë që mund të çojë në një vendim për ndërprerje mandati kushtetues.
Sekretari i Këshillit Bashkiak nuk ka asnjë tagër ligjor për të marrë vendime në emër të Këshillit, dhe aq më pak për të interpretuar mënyrën se si Kryetari i Bashkisë duhet të ushtrojë të drejtën e tij për mbrojtje. Funksioni i Sekretarit është thjesht administrativ, jo politik dhe jo vendimmarrës.
Edhe një ditë para mbledhjes:
• Kryetari i Bashkisë nuk është informuar zyrtarisht për qëllimin e mbledhjes;
• Nuk është dërguar rendi i ditës;
• Nuk janë bërë të ditura shkaqet apo materialet mbi të cilat pretendohet shkarkimi;
• Nuk është garantuar e drejta për t’u dëgjuar e mbrojtur.
Kujtojmë se Kryetari i Bashkisë ndodhet në kushtet e paraburgimit, përmes një mase sigurimi joproporcionale, gjë që kufizon ndjeshëm aftësinë e tij për të qenë prezent me vullneti apo për të ndjekur në mënyrë efektive një proces që mund të prekë statusin e tij si i zgjedhur me votë nga qytetarët e Tiranës.
Kryetari i Bashkisë, z. Erion Veliaj, mbetet në pritje të një vendimmarrjeje të qartë dhe të dokumentuar nga Këshilli Bashkiak, që garanton në mënyrë të plotë të drejtën e tij për të ushtruar mbrojtjen dhe për të qenë i dëgjuar, siç i takon çdo qytetari të Republikës së Shqipërisë, aq më tepër një të zgjedhuri në mënyrë demokratike”, thotë mbrojtja e Veliajt.
Përgjigja e Veliajt për sekretarin e Këshillit Bashkiak Tiranë
Komente
Edi Rama po bēhet mē keç se Sali Berisha i ka hyp vedi nē çef. E Edi mendon se ēshtē zoti vet nē Tok. Por prit mor beg se ka Henek. E pastaj Edi kastravecin do haj.
Përgjigju