Presidentja e Komisionit Evropian, Ursula von der Leyen, tha se me planin 'ReArm', “Rarmatimi i Evropës” do të vihen në dispozicion fonde prej 800 miliardë eurosh.
"Po jetojmë në kohë të rrezikshme, siguria e Evropës është seriozisht e kërcënuar dhe çështja tani është nëse do të jemi në gjendje të reagojmë me shpejtësinë e nevojshme" u shpreh presidentja e Komisionit Evropian, Ursula von der Leyen, gjatë prezantimit të planit ReArm Europe me pesë pika.
Plani për "riarmatimin e Evropës" do të ofrojë ndihmë "të menjëhershme" për Ukrainën.
Ajo garantoi se do të vijojë bashkëpunimi me partnerët në NATO
"Evropa është e gatshme të marrë përgjegjësitë e saj. Do të vazhdojmë të punojmë me partnerët tanë në NATO. Ky është një moment kyç për Evropën dhe ne jemi gati të bëjmë më shumë" shtoi ajo pak ditë para samitit të jashtëzakonshëm për mbrojtjen, duke theksuar se po jetojmë në një "epokë riarmatimi".
Presidentja e Komisionit Evropian, propozoi lehtësimin e rregullave buxhetore për të nxitur investimet në sektorin e mbrojtjes.
"Kjo do t'u mundësojë vendeve anëtare të rrisin ndjeshëm shpenzimet e tyre për mbrojtjen pa shkaktuar nisjen e procedurës për deficit të tepërt," tha ajo nga Brukseli.
"Shtetet anëtare do të kenë mundësinë të përdorin programet e politikës së Kohezionit për të rritur shpenzimet në mbrojtje," deklaroi presidentja e Komisionit Evropian, Ursula von der Leyen, gjatë prezantimit të planit ReArm Europe
Udhëheqësit e Bashkimit Evropian do të zhvillojnë bisedime urgjente të enjten për të siguruar mbështetje ushtarake për Kievin dhe për të përgatitur një force paqësore për dislokim të mundshëm në Ukrainë.
Njoftimet për rritjen e shpenzimeve në fushën e mbrojtjes, shkaktuan një rritje të aksioneve të kompanive të prodhimit të armëve në Evropë.
Monedha evropiane Euro u forcua, duke shënuar një rritje në tregun e këmbimit të valutave kundrejt dollarit, ndërsa investitorët u dyndën në tregun evropian të aksioneve, ku një indeks i kompanive të hapësirës ajrore dhe mbrojtjes “.SXPARO” arriti nivele rekord.
Evropa është përballur me trysni për të shpenzuar më shumë për sigurinë e saj pas sulmit në shkallë të gjerë të Rusisë ndaj Ukrainës tre vjet më parë dhe nevoja për të vepruar është bërë urgjente, pasi evropianët, përfshirë Ukrainën, janë lënë mënjanë në bisedimet midis Uashingtonit dhe Moskës.
Lajmi ne perditesim...
Komente
