Të martën e 11 marsit rikthehet Champions League me katër ndeshjet e para të kthimit për fazën e 1/8. Mbrëmjen e sotme tifozët e futbollit do mësojnë katër skuadrat e para që do marrin një biletë për në çerekfinale, ku të avantazhuar janë Interi dhe Bayern Munich, falë fitoreve më bindëse në sfidat e një jave më parë.
Gjithçka nis në orën 18:45 në Katalonjë, aty ku Barcelona pret ‘Shqiponjat’ e Benficas. Skuadra e Hansi Flick fitoi 0-1 në Portugali një javë më parë, mirëpo avantazhi është minimal dhe gjithçka e hapur.
Ora 21:00 zbret në fushë gjashtë skuadra. Në ‘BayArena’ Bayer Leverkusen pret Bayern Munich, me miqtë që kanë fituar 3-0 ndeshjen e parë në Bavari. Vetëm një mrekulli mund t’i kualifikojë ‘Aspirinat’ për më tej.
Në ‘Giuseppe Meazza’ Interi luan kundër Feyenoord, me italianët që kanë epërinë e dy golave nga ndeshja e parë në Rotterdam. Në ‘Anfield’ Liverpooli pret PSG-në. Anglezët fituan 0-1 në Paris dhe gjithçka mbetet e hapur.
Champions League, faza e 1/8 - Ndeshjet e kthimit:
E martë, 11 mars 2025
18:45 Barcelona - Benfica (1-0)
21:00
Bayer Leverkusen - Bayern Munich (0-3)
Inter - Feyenoord (2-0)
Liverpool - PSG (1-0)
E mërkurë, 12 mars 2025
18:45 Lille - Dortmund (1-1)
21:00
Arsenal - PSV (7-1)
Aston Villa - Club Brugge (3-1)
Atletico Madrid - Real Madrid (1-2)
*Në kllapa rezultatet e ndeshjeve të para
Këtë të martë në orën 18:45 Barcelona pret Benficën. Sfida vlen për ndeshjen e kthimit në 1/8 e Champions League. Përballja e parë në Portugali foli 0-1 për katalanasit, por sfida është e hapur.
Për mediet trajneri i vendasve, Hansi Flick motivoi të tijtë dhe kërkon një fitore për mjekun e klubit, 40-vjeçarin Carles Minarro, të ndarë nga jeta të shtunë gjatë grumbullimit me ekipin.
“Nuk është vendosur ende asgjë. Asnjë nga ne nuk mendon se është mbyllur kualifikimi. Lojtarët janë ende shumë të trishtuar për ndarjen nga jeta të mjekut të skuadrës. Ishte një person i mrekullueshëm dhe ka bërë një punë të shkëlqyer. Është humbje e madhe për ne. Kjo është jeta. Tani duhet të fitojmë dhe ta bëjmë për të nderuar Minarron”, u shpreh Flick.
Interi pret sot në orën 21:00 Feyenoordin në ndeshjen e kthimit për 1/8 e Champions League. Paçka se fituan 0-2 ndeshjen e parë në Holandë dhe janë me ‘një këmbë’ në çerekfinale, Simone Inzaghi nuk i beson Feyenoordit.
‘’Jemi krenarë për këtë që po bëjmë, pavarësisht se duhet të luajmë kaq shumë ndeshje. Këta djem ndonjëherë gjejnë energji, për të cilat ne pyesim veten sesi e bëjnë. Jemi të fokusuar te Feyenoord, e cila do të jetë ndeshja e 20-të për ne në vitin 2025.
Fituam 2-0 ndeshjen e parë, por në Champions League duhet kujdes, sepse çdo takim ka kurthet e veta. Sommer do të luajë në portë, ndonëse portieri Martinez ka bërë shumë mirë këto ndeshje”, tha trajneri i Interit, Inzaghi.
Komente
