245,975 shqiptarëve në diasporë do tu dërgohet fleta e votimit, për të votuar për herë të parë, përmes postës. Kjo është shifra finale e prodhuar nga seleksionimi që KQZ i bëri aplikimeve nga jashtë vendit.
Shifra tejet e lartë dhe e paparashikuar në nisje të procesit, shoqërohet me 48,180 zgjedhës të tjerë, të cilëve u është refuzuar kërkesa. Të pranuarit, mund të korrigjojnë adresat e tyre pas datës 9 mars, kur të dalë lista paraprake e votuesve nga jashtë, ndërsa ata që janë refuzuar, nuk do ta kenë një shans të dytë.
Jo më. Pas datës 9, ka 48 orë kohë për saktësim adrese vetëm për ata që janë regjistruar.
Deri më 11 prill, të refuzuarit mund të ankohen në Gjykatën e Tiranës. Procesi i aplikimit ka shënuar po ashtu rekordet e veta.
“98-vjeçari më i moshuari që u regjistrua online. Nga Gjermania aplikimi i suksesshëm. Një person tjetër 25 herë aplikoi dhe më në fund ja doli”, tha Celibashi.
Përfundimisht, Tirana pret nga diaspora 52 425 vota, ndërsa më pak nga të gjithë, janë votues nga Kukësi, vetëm 3 970.
Më shumë se gjysma e aplikimeve erdhën nga Greqia dhe Italia, sikundërse nuk munguan kërkesat nga çdo kënd i botës, konkretisht nga 107 shtete.
Posta do t’i shkojë votuesit gjatë mesit të prillit dhe diaspora duhet t’i kthejë fletët e plotësuar në KQZ, brenda orës 19:00 të datës 11 maj. Çdo zarf i ardhur pas këtij orari, nuk do të numërohet.
Komente
