Kryesocialisti Edi Rama, në kuadër të turit të tij elektoral ditën e sotme (19 prill) në qarkun e Korçës, ka zbritur edhe në zonën e Ersekës.
Ai u takua me komunitetin e socialistëve, “për Shqipërinë në BE” dhe “një zhvillimin të mëtejshëm të Kolonjës”, siç e cilësoi. Gjithashtu është inspektuar edhe rruga e re e Vjosës, e cila do të lidhë bregdetin me juglindjen.
“Një tjetër projekt i madh në shërbim të ekonomisë dhe turizmit”, tha kryeministri për këtë investim të qeverisë.
Ai ishte i shoqëruar edhe nga kreu politik i qarkut, Niko Peleshi, kryebashkiaku i Ersekës, Erjon Isai, ministrja Belinda Balluku dhe kandidatët e PS për qarkun e Korçës.
Peleshi tha se “ky është vendi më i bukur për t’u mbledhur dhe për të folur për këto projekte të qeverisë, por edhe një zonë e njohur e rilindësve shqiptarë”.
“Me këtë segment mbyllim rrethin turistik dhe fantastik të kësaj zone dhe lidhjet e zonave me trashëgimi kulturore e historike mes tyre. Kjo është një Zvicër e vogël”, shpjegoi ai.
Kryeministri e nisi fjalën e tij duke kujtuar episodin e shkuar me rrugën që po inaugurohej sot, e cila u shemb dhe pati akuza dhe sulme nga kundërshtarët.
“Teksa isha i ulur aty, më erdhën në mend imazhet e një momenti kur kjo rrugë pësoi një shembje diku aty dhe se si gjithë speciet e kënetës u ngritën dhe deklaruan se u shemb rruga, u vodh rruga, iku rruga, s’ka më rrugë, ndërkohë që ai ishte një aksident, nga ato që edhe ndodhin, brenda garancisë, kur rruga nuk ishte dorëzuar ende, e ku të gjitha shpenzimet kompania i mbuloi dhe rruga u bë më e mirë dhe më e fortë. Punët janë të ndara, kjo histori është e ndarë, ne kemi barrën të ndërtojmë, të përpiqemi të ndërtojmë, të vazhdojmë, kurse të tjerët përpiqen të na sulmojnë, të na hedhin baltë, që nuk kursejnë as Shqipërinë”, u shpreh ai.
Teksa më tej solli si shembuj Skënderbeun që u përball me një perandori të tërë osmane dhe më tej rilindasit që punuan për vendin drejt Europës. Ndaj apeloi që vota e 11 majit të ishte masive, duke e krahasuar rrugën integruese pikërisht me atë segment nga i cili mbajti edhe fjalimin e tij.
“Nuk e sjell këtu për ankesë apo për t’u qarë, sepse jemi mësuar me të, por se ky është moment jashtëzakonisht i rëndësishëm në rrugëtimin e përbashkët të shqiptarëve drejt një destinacioni dhe asaj çfarë është thënë që në kohën e Skënderbeut, ku Kolonja është bërë një rrugë lidhëse. Sepse ai ishte profeti kombëtar dhe u bë mburojë e Perëndimit, ai ishte zgjidhja e zgjedhja, që ia përcolli brez pas brezi kësaj gjenerate, gjeneratës tonë, që sot ka hapin e madh, të ketë në dorë të bëjë hapin e fundit. Mënyra sesi jemi vendosur këtu është sikur jemi këtu te finishi, ashtu sikurse kjo rrugë kemi nisur atë rrugën tjetër që s’e besonte njeri se do realizohej ndonjëherë, edhe pse ishte premtuar dhe stërpremtuar. Kaluam në disa faza, ndodhi edhe rrëshqitja, por u rikthyem në vend dhe ja ku jemi, duke folur për një tjetër rrugë e projekt. Në këtë pikë ku jemi sot, është 11 maji dhe më 11 maj duhet të mendojmë për finishin e Shqipërisë, jo për mandatet dhe votat e partisë, por për finishin”, vijoi kryesocialisti.
Ai e quajti një derë fati atë që po ndodhte aktualisht me vendin, për shansin e integrimit dhe se nëse nuk nxitohej dhe jepej mesazh i qartë më 11 maj, ajo portë mund të mbyllej.
“Si do shkojë Shqipëria në finish? Vetëm nëse Shqipëria nuk humbet asnjë minutë, nëse negociatat arrihen brenda planit në vitin 2027, që nuk e ka arritur asnjë vend këtë, me përjashtim Finlandës që ishte histori tjetër. Kujtojmë Malin e Zi, Serbia, Maqedonia, e cila është që në 2005 kandidate, kurse ne na ka parë Zoti në këtë pikë, në këtë moment, ka dhënë mundësinë për shqiptarët ta kenë fatin në dorë. Fati nuk rri aty, vjen dhe ikën, nuk vjen të rrijë aty derisa të zgjohesh ti nga gjumi e të bësh punët e tjera, kjo është rruga e vetme për t’i dhënë fund një historie, pasi shqiptarët në shekuj ka qenë një popull i mbetur në rrugë, për mbijetesë, e trajtuar si qenie e dorës së dytë e të tretë. Ne e kemi pasaportën edhe sot, ne lëvizim, por duhet të kthehemi përsëri, se ndryshe duhet të kërkojmë azil atje. Edhe sot rrinë e torturohen me dokumente, ja ku i keni në Greqi, pastaj me pensionet, kur do na njihen, marrëveshja etj., ndërkohë që këto i zgjidh ajo aty (rruga në BE). Nëse ne hyjmë në BE, ajo pasaportë është gjithçka, leje pune, pensioni, udhëtimi etj. Jemi një popull i barabartë me të tjerët, sy më sy me ta”, tha Rama.
Ai foli edhe për të mirat që i vijnë Kolonjës me integrimin dhe investimet.
“E ardhmja e Kolonjës ka nisur, numrat e tregojnë edhe turizmi e tregon. Nuk vinin dikur turistët në Kolonjë, se dukej sikur shkonin në luftë, kurse sot është kënaqësi të vish, me plane e projekte, me mundësi për turistë dhe vizitorë nga Tirana, që shtohen dita-ditës . Kemi dhe paketën e maleve. Dhe qershia mbi tortë do të jetë qendra e madhe turistike e skive midis Kolonjës dhe Korçës, e cila do sjellë një zhvillim të madh dhe të ardhura të larta, pasi do ketë shumë turistë, që edhe do konsumojnë shumë këtu. Ndaj të bëjmë çmos që më 11 maj të jemi më shumë se asnjëherë tjetër.
Siç thotë fjala e urtë e rilindësve, “Sos për mua e për ty, por për Shqipëri”. Hyrja në BE është çështje dinjiteti, por jo patjetër e tillë, pasi është zgjidhje e shumë gjërave, e jo vetëm personalisht”, shpjegoi ai mes të tjerash.
Në fund kryesocialisti theksoi se e ardhmja e Shqipërisë duhet të jetë BE-ja dhe atje e çon vetëm Partia Socialiste. Kurse me Sali Berishën ai tha se vendi do rrijë përsëri në gropë dhe kjo s’mund të ndodhë.
“Zgjedhja e 11 majit është e qartë, është zgjedhje e një populli të tërë dhe hallit të një individi të vetëm. Kaq e qartë është. Mes të mirës së përbashkët të një vendi të tërë dhe interesit të një familjeje të vetme. Është mes Shqipërisë me BE në Europë dhe me bufin e kënetës prapë në gropë. Epo në gropë le të rrijë bufi dhe kush do të rrijë me bufin. Shqipëria më kurrën e kurrës!”, tha Rama.
Kryeministri Edi Rama e mbylli fjalën e tij nga rruga e re në Kolonjë, që kalon në luginën e Vjosës dhe lidh bregdetin me juglindjen e vendit, duke apeluar për shqiptarët që të votojnë masivisht për integrimin europian më 11 maj.
Kryesocialisti theksoi se nuk bëhet fjalë për parti dhe kandidatë, por për një të ardhme për shqiptarët.
Madje theksoi se duke votuar “bufin e kënetës”, votohej për interesin e tij dhe të familjes së tij, duke e lënë vendin në gropë.
“Zgjedhja e 11 majit është e qartë, është zgjedhje e një populli të tërë dhe hallit të një individi të vetëm. Kaq e qartë është. Mes të mirës së përbashkët të një vendi të tërë dhe interesit të një familjeje të vetme. Është mes Shqipërisë me BE në Europë dhe me bufin e kënetës prapë në gropë. Epo në gropë le të rrijë bufi dhe kush do të rrijë me bufin. Shqipëria më kurrën e kurrës! Faleminderit!”.
Edhe pse është sulmuar ditët e fundit për ironitë e tij nga turi elektoral në Dibër, ku tha se “gjysma e burrave janë çyrykë”, kryesocialisti Edi Rama iu rikthye përsëri shprehjes së tij që ka tërbuar kundërshtarët politikë, teksa i drejtohej grave dhe vajzave të Kolonjës, për të bindur burrat me mend, sepse për çyrykët shpjegoi do u duhej të prisnin që të rikuperoheshin.
Ai vijoi humorin e tij edhe me faktin se “burrat sikur pinë nga një çikë, por vetëm ndonjëherë” dhe adresoi këshillën ndaj grave që nëse do ishin në atë gjendje ditën e zgjedhjeve, do u duhej t’i mbanin nga krahu për t’i çuar te kutia e votimit.
Rama nënvizoi furinë e madhe të gruas, duke e shpjeguar edhe me shifrën 56% që mbështesin PS-në dhe i cilësoi si “forcë e madhe” për 11 majin.
“Ju lutem grave dhe vajzave të Kolonjës, se burrat çoç sikur pinë nga një çik raki edhe kanë nevojë për ndonjë për t’i kapur nga krahu dhe për t’i çuar te kutitë e votimit... Po nganjëherë, nganjëherë... Ju lutem grave dhe vajzave të Kolonjës që të bëjnë çmosin që mbështetjen tuaj ta kemi si asnjëherë tjetër, sepse nëse kemi ardhur deri këtu, arsyeja madhore është se kemi mobilizuar si kurrë më parë fuqinë e grave dhe vajzave, u kemi dhënë mundësinë të përfaqësohen e të marrin përgjegjësi. Kemi çliruar nga paragjykimet shumë vajzave dhe ka shumë për të bërë në këtë drejtim, por mbështetemi te to si një forcë e madhe. Kemi 56% e vajzave e grave që na mbështesin në të gjithë Shqipërinë, është krenari e madhe që kemi këto shifra. Krenari e madhe kjo! Sepse gjykimi dhe vlerësimi i gruas është ai që ka peshën më të madhe, ju e dini shumë mirë, e dinë edhe burrat, pavarësisht se nganjëherë s’duan ta pranojnë dhe bëjnë gabim që s’duan ta pranojnë! Më mirë pranoje dhe je në rregull”, u shpreh kryesocialisti në takimin e Kolonjës, në rrugën e re të Vjosës.
Kreu i mazhorancës e vijoi batutën e tij për burrat, duke i qëndruar mendimit se gjysma e tyre i mjafton PS.
“Kemi dhe shumicën e të rejave e të rinjve të votuesit të parë, gjysma e burrave e burrave na mjafton, gjysma shikon e kupton, gjysma tjetër është çyrykë. Me këto shifra na mjafton gjysma e burrave. Të tjerëve nuk kemi ça i bëjmë, do presim të rehabilitohen, të rekuperohen dhe të kuptojnë se e ardhmja është BE dhe Shqipërinë në BE e çojmë vetëm ne”, tha kryeministri.
Gjatë fjalës së kryesocialistit Edi Rama në rrugën e re të Kolonjës që lidh bregdetin me zonën e juglindjes dhe do të zhvillojë turizmin, nuk kanë munguar as batutat e përhershme dhe ironitë me opozitën dhe kreun e PD-së, Sali Berisha.
Teksa fliste për zhvillimin e zonës dhe përfitimet ekonomike e turistike nga hyrja e Shqipërisë në BE, grantet dhe fondet që siguroheshin për të investuar më shumë, një nga qytetarët e pranishëm thirri emrin e tij “Edi Rama...!”.
Disi i ‘kompleksuar’ nga kjo ndërhyrje, kryeministri iu drejtua duke i kërkuar ‘llogari’ se përse e ndërpreu kur po thoshte diçka të rëndësishme për komunitetin e zonës dhe shqiptarët. Në nëntekst ideje ai shpjegoi se atë e kishin këtu dhe se u duhej shqiptarëve për t’i çuar në BE, kurse për t’i mbajtur jashtë BE-së kishin “bufin e kënetës”.
“Hyrja në BE është çështje dinjiteti, por jo patjetër e tillë, pasi është zgjidhje e shumë gjërave, e jo vetëm personalisht. Pasi fondet për fshatin, zhvillimin rural, agro-turizmin (Edi Rama, ndërhyn dikush nga mbështetësit)... Po pse ma ndërpret fjalën kur po thoja diçka që i intereson të gjithëve me këtë Edi Ramën?! Edi Ramën këtu e keni, si brenda BE edhe jashtë BE, këtu jam unë. Jashtë BE-së nuk ju duhem, ju duhem për t’ju çuar në BE. Për t’ju mbajtur jashtë BE-së keni bufin e kënetës”, tha Rama.
Dhe për ta finalizuar batutën e tij ironike me rivalin politik, shtoi:
“Po për juve këtij është kot për t’ua zënë me gojë (Sali Berishën), sepse ju këtu ia keni kënduar këngën me kohë, që para se ai të bëhej buf. Po thosha se për zhvillimin rural, për agro-turizmin janë 300 mln euro në vit dhe që i shërbejnë zonës dhe zhvillimit...”, u shpreh kryeministri.
Komente
NE 11 MAJ ME PARTITE E REJA NE EUROPE,,,JO ME TY O RAMA O HAJDUT .....
Përgjigju